اسلام آباد: وزیراعلیٰ سندھ مراد علی شاہ کا کہنا ہے کہ نوری آباد پاور پلانٹ سے کے الیکٹرک سستی بجلی لیتا ہے۔

اسلام آباد میں میڈیا سے گفتگو کرتے ہوئے وزیراعلیٰ سندھ مراد علی شاہ نے کہا کہ میں آج پھرنوری آباد ریفرنس میں پیش ہوا، ریفرنس میں تمام لوگ کراچی سے اسلام آباد آتے ہیں، ایک پیشی پر ہر شخص کے تقریباً ایک لاکھ روپے خرچ ہوتےہیں۔

وزیراعلیٰ سندھ نے کہا کہ آج پھر نئی تاریخ دے دی گئی، نوری آباد پاور پلانٹ پر اب تک 22 پیشیاں ہوچکی ہیں، ریفرنس 4 سال سے چل رہا ہے، وقت ضائع کیا جارہا ہے۔

مراد علی شاہ کا مزید کہنا تھا کہ گزشتہ حکومت نے مخالفین پر بے بنیاد کیسز بنائے، گزشتہ حکومت نے مجھ پر کرپشن کا جھوٹا مقدمہ بنایا، نوری آباد پاور پلانٹ سے کے الیکٹرک سستی بجلی لیتا ہے۔

وزیراعلیٰ سندھ نے کہا کہ سندھ کے ساتھ بہت زیادہ ناانصافی کی گئی، سندھ اور بلوچستان میں پانی کی بہت قلت ہے۔

وزیراعلیٰ سندھ مراد علی شاہ کا مزید کہنا تھا کہ پی ٹی آئی حکومت کو آئینی طریقے سے ہٹایا گیا، صدر صاحب صدرمملکت بن کر دکھائیں، صدرمملکت ایک شخص کی مرضی پرنہ چلیں۔