چیئرمین کشمیر کونسل یورپی یونین (ای یو) علی رضا سید نے یورپی پارلیمنٹ کی انسانی حقوق کی ذیلی کمیٹی کی سربراہ ماریا ایرینا سے ملاقات کی۔
ملاقات میں علی رضا سید نے ماریا ایرینا کو مقبوضہ کشمیر میں جاری انسانی حقوق کی خلاف ورزیوں اور پامالیوں سے آگاہ کرتے ہوئے کہا کہ ان جرائم میں ملوث افراد کو کسی قسم کی بھی چھوٹ نہ دی جائے۔
اس ضمن میں یورپی عہدیدار ماریا ایرینا کا کہنا تھا کہ ہم کہیں بھی انسانی حقوق کی خلاف ورزیوں میں ملوث افراد کی استثناء کے حامی نہیں ہیں۔
چیئرمین کشمیر کونسل ای یو نے اس موقع پر ماریا ایرینا اور دیگر یورپی عہدیداروں کو ایک خط دیا جس کے متن میں لکھا گیا کہ بھارتی سکیورٹی اہلکار کشمیریوں کے انسانی حقوق کس طرح پامال کررہے ہیں۔
اس کے علاوہ خط میں مطالبہ بھی کیا گیا کہ یورپ سمیت عالمی برادری کشمیریوں کے حقوق کی پامالیوں کو روکنے میں اپنا کردار ادا کرے۔
