وزیراعظم شہباز شریف تین روزہ سرکاری دورے پر ترکی پہنچ گئے ہیں۔

ذرائع کے مطابق ترک وزیر دفاع سمیت اعلیٰ حکام نے انقرہ ایئرپورٹ پرشہباز شریف کا پرتپاک استقبال کیا اور انہیں گارڈ اَف آنر بھی پیش کیا گیا۔

وفد میں وزیراعظم کے ہمراہ وفاقی وزرا بشمول وزیر دفاع خواجہ آصف، وفاقی وزیر اطلاعات و نشریات مریم اورنگزیب، وفاقی وزیر برائے سرمایہ کاری بورڈ چوہدری سالک حسین اور وزیراعظم کے معاونین خصوصی بھی شامل ہیں۔

وزارت عظمیٰ کا منصب سمبھالنے کے بعد شہباز شریف کا یہ پہلا دورہ ترکی ہے جہاں وہ ترکی کے صدر رجب طیب اردوآن سے بالمشافہ ملاقات کریں گے جس میں پاک ترک تعلقات کے ہر پہلوؤں کا جائزہ لیا جائے گا جب کہ دونوں رہنما علاقائی و عالمی امور پر بھی تبادلہ خیال کریں گے۔

رواں برس پاک ترک سفارتی تعلقات کے قیام کی 75 ویں سالگرہ منائی جا رہی ہے جس کے تحت وزیراعظم اور صدررجب طیب اردوآن مشترکہ طور پر یادگاری نشان بھی جاری کریں گے جو ترکی اور پاکستان کے درمیان غیر معمولی دوطرفہ تعلقات کی طویل تاریخ میں اس اہم سنگ میل کی مناسبت سے تیار کیا گیا ہے۔