اسلام آباد: دفترخارجہ نے پاکستان کے کسی بھی وفد کے دورہ اسرائیل کی تردید کردی اور کہا کہ فلسطین کے مسئلے پر پاکستان کی پوزیشن واضح اور صاف ہے، پاکستان کی پالیسی میں کوئی تبدیلی نہیں ہے اور اس پر مکمل قومی اتفاق رائے ہے، فلسطین کی آزادی اور خودمختاری کی حمایت کرتے ہیں۔
پاکستانی وفد کے دورہ اسرائیل کے معاملے پر ترجمان دفترخارجہ عاصم افتخار نے وضاحت جاری کرتے ہوئے کہا کہ پاکستان کے کسی وفد کے دورہ اسرائیل کا تصور واضح طور پر مسترد کرتے ہیں، زیربحث دورے کا اہتمام غیرملکی این جی او نے کیا تھا جو پاکستان میں مقیم نہیں۔
پاکستان کے کسی وفد نے اسرائیل کا دورہ نہیں کیا، ترجمان دفتر خارجہ#AajNews #AajUpdates pic.twitter.com/vRnvSK35gl
— Aaj News (@Aaj_Urdu) May 30, 2022
ترجمان دفترخارجہ نے کہا کہ مسئلہ فلسطین پر پاکستان کا مؤقف واضح اور غیرمبہم ہے ، فلسطین پر ہماری پالیسی میں کوئی تبدیلی نہیں آئی اور اس پر مکمل قومی اتفاق رائے ہے، پاکستان فلسطینی عوام کے ناقابل تنسیخ حق خودارادیت کی مستقل حمایت کرتا ہے۔
ترجمان دفترخارجہ نے مزید کہا کہ اقوام متحدہ اور او آئی سی کی متعلقہ قراردادوں کے مطابق ایک آزاد فلسطینی ریاست کا قیام اور اس کا دارالحکومت القدس الشریف خطے میں منصفانہ اور دیرپا امن کیلئے ناگزیر ہے۔
