وہاڑی: ٹبہ سلطان پور کے قریب ٹریفک حادثہ میں خاتون سمیت 6 افراد موقع پر ہی جاں بحق جبکہ 5 افراد شدید زخمی ہو گئے۔

آج نیوز کے مطابق وہاڑی میں ٹبہ سلطان پور کے قریب تیز رفتار مسافر وین اور کار کے درمیان خوفناک ٹریفک حادثہ ہوا جس کے نتیجہ میں ایک خاتون اور 4سالہ بچی سمیت 6 افراد جاں بحق اور 5 زخمی ہو گئے۔

حادثہ کی اطلاع ملنے پر ریسکیو اہلکاروں نے موقع پر پہنچ کر لاشوں اور زخمیوں کو ڈسٹرکٹ اسپتال وہاڑی منتقل کیا چار زخمیوں کی حالت تشویشناک ہونے پر انہیں نشتر اسپتال ملتان کے لیے ریفر کردیا گیا۔

عینی شاہدین کے مطابق حادثہ تیز رفتاری کے باعث پیش آیا جبکہ حادثہ کا شکار ہونے والی مسافر وین وہاڑی سے ملتان جبکہ کار ملتان سے وہاڑی کی جانب جا رہی تھی۔

تاہم لاشوں اور زخمیوں کی تاحال شناخت نہ ہوسکی ہے پولیس نے موقع پر پہنچ کر حادثہ کا شکار ہونے والی دونوں گاڑیوں کو قبضہ میں لے کرمزید کارروائی کا آغاز کردیا ہے۔