کراچی: پاکستان تحریک انصاف (پی ٹی آئی) کے ارکان سندھ اسمبلی کو لاہور جلسہ سی ویو پر لائیو دکھانے کیلئے انتظامیہ سے اجازت نہیں مل سکی۔

نوٹیفکیشن کے مطابق ڈیفنس ہاؤسنگ اتھارٹی (ڈی ایچ اے) نے رکن صوبائی اسمبلی محمد شہزاد قریشی کی درخواست مسترد کردی ہے اور پولیس نے پی ٹی آئی کے سمندر کے کنارے لاہور جلسے کی لائیو اسکریننگ کے پروگرام کو روک دیا ہے۔

اس ضمن میں رہنما تحریک انصاف و قائد حزب اختلاف سندھ حلیم عادل شیخ نے رد عمل دیتے ہوئے کارکان کو وقت پر سی ویو کے مقام پہنچنے کی کال دیتے ہوئے کہا کہ یہیں اسٹیج و اسکرین بھی لگائیں گے اور ہر حال میں پروگرام اسی جگہ پر ہوگا۔

خیال رہے کہ پی ٹی آئی نے لاہور جلسے کو دکھانے کے لیے آج سی ویو کے مقام لائیو اسکرین لگانے کا اہتمام کیا تھا۔