اسلام آباد: وزیر برائے مواصلات و پوسٹل سروسز مراد سعید نے کہا ہے کہ اپوزیشن جماعتیں اپنے مفادات کیلئے اسلام آباد میں اسلامی تعاون تنظیم (او آئی سی) کے وزرائے خارجہ کی کانفرنس کو جان بوجھ کر سبوتاژ کر رہی ہیں۔

ایک نجی نیوز چینل سے گفتگو کرتے ہوئے انہوں نے کہا کہ اس سے ظاہر ہوتا ہے کہ وزیراعظم کے خلاف اپوزیشن کے عدم اعتماد کے اقدام کے پیچھے بیرونی ہاتھ ہے۔

انہوں نے کہا کہ اپوزیشن کرپٹ لوگوں کا ایک گروہ ہے جو صرف قومی مفاہمتی آرڈیننس (این آر او) چاہتے ہیں، لیکن کامیاب نہیں ہوں گے۔

اس سے قبل 15 مارچ کو وزیر اطلاعات و نشریات فواد چوہدری نے کہا تھا کہ پاکستان ڈیموکریٹک موومنٹ کے سربراہ مولانا فضل الرحمان کا اصل ایجنڈا اسی روز اسلام آباد میں ہونے والے او آئی سی وزرائے خارجہ کے اجلاس کو سبوتاژ کرنا ہے۔

ایک ٹویٹ میں انہوں نے فضل الرحمان کی جانب سے 23 مارچ کو اسلام آباد کی طرف لانگ مارچ کرنے کے اعلان پر افسوس کا اظہار کیا۔

وزیر اطلاعات نے کہا تھا کہ اپوزیشن کے لیے 15 سال کے وقفے کے بعد اسلام آباد میں او آئی سی کے وزرائے خارجہ کی کانفرنس کو ہضم کرنا مشکل ہے۔

انہوں نے کہا تھا کہ اپوزیشن 23 مارچ کو اسلام آباد کو بلاک کرنا چاہتی ہے جب پورا ملک یوم پاکستان منائے گا۔ تاہم، انہوں نے کہا تھا، حکومت جانتی ہے کہ فسادیوں سے کیسے نمٹا جائے۔