معروف سماجی رابطے کی ایپلی کیشن واٹس ایپ میں ازخود میسج غائب ہو جانے والے فیچر میں بڑی تبدیلی متوقع ہے۔
واٹس ایپ صارفین کو شکایات رہتی ہیں کہ پیغام اس وقت غائب ہو جب وصول کنندگان اسے پڑھ لے لیکن بعض اوقات اہم پیغامات بغیر پڑھے بھی غائب ہو جاتے ہیں۔
غیر ملکی میڈیا رپورٹس کے مطابق کمپنی نے اس مسئلے پر کام شروع کر دیا ہے تاہم صارفین غائب ہونے والے میسیجز میں سے اہم پیغامات بعد میں بھی دیکھ سکیں گے جبکہ یہ فیچر ابتدائی مراحل میں ہے اور اس کے مستقل انتخاب کے بارے میں ابھی کچھ نہیں بتایا گیا۔
رپورٹ میں بتایا گیا ہے کہ واٹس ایپ کی سکیورٹی کو مزید مضبوط بنانے کے لیے اس میں ایک نئے فیچر کا اضافہ کیا جا رہا ہے جسے ”کوڈ ویری فائی“ کا نام دیا گیا ہے، یہ کمپنی کے جاری کردہ اس اعلان کا تسلسل ہے جس میں اسمارٹ فون اور ڈیسک ٹاپ صارفین کے لیے براہ راست ٹو اسٹیپ ویری فکیشن کی بات کی گئی۔
کوڈ ویری فائی فیچر واٹس ایپ ویب استعمال کرتے وقت پلیٹ فارم کی سکیورٹی کو بہتر کرے گا جوکہ بنیادی طور پر ایک ویب براؤزر ایکسٹینشن کی طرح ہوگا اور یہ فیچر صارفین کے تجربے میں ایک سکیورٹی لیئر کا بھی اضافہ کرے گا۔
اس کے علاوہ ایک بار کوڈ ویری فائی انسٹال کرنے کے بعد خودکار سسٹم کے تحت کوڈ کی تبدیلی کے متعلق معلوم کیا جا سکے گا اور یہ فیچر گوگل کروم، موزیلا فائر فاکس اور مائیکرو سافٹ براؤزر کے ذریعے واٹس ایپ ویب صارفین کے لیے دستیاب ہوگا۔
