اسلام آباد: وزیر داخلہ شیخ رشید احمد نے کہا ہے کہ وفاقی حکومت صوبے خصوصاً کراچی میں امن و امان کے بڑھتے ہوئے مسائل کے تناظر میں صوبہ سندھ میں رینجرز کی تعیناتی بڑھانے کے لیے تیار ہے۔

کراچی میں اسٹریٹ کرائم کی بڑھتی ہوئی وارداتوں پر ردعمل دیتے ہوئے وزیر داخلہ نے کہا کہ ہم پولیس تھانوں میں رینجرز تعینات کرنے کے لیے تیار ہیں، "وزیراعلیٰ سندھ جو بھی تعاون مانگیں گے ہم دینے کے لیے تیار ہیں۔"

انہوں نے آنے والے دنوں میں ہائی پروفائل ایونٹس کا شیڈول مزید شیئر کرتے ہوئے کہا کہ وزیراعظم عمران خان کل روس کا دورہ کریں گے، او آئی سی کانفرنس 22 مارچ کو شیڈول ہے جبکہ آسٹریلوی کرکٹ ٹیم 27 مارچ کو پاکستان کا دورہ کر رہی ہے۔

انہوں نے کہا کہ مجھے نہیں لگتا کہ اپوزیشن 23 مارچ کو اسلام آباد کی طرف مارچ کرے گی۔

وزیر داخلہ نے چیلنج کرتے ہوئے کہا کہ اپوزیشن کی جانب سے عدم اعتماد کا اقدام کامیاب نہیں ہوگا۔

انہوں نے کہا کہ عمران خان کو اقتدار میں آئے ساڑھے تین سال ہو گئے ہیں اور اپوزیشن پہلے دن سے انہیں ہٹانے پر تلی ہوئی ہے تاہم ان کی کوئی بھی کوشش کامیاب نہیں ہو سکی۔

شیخ رشید نے کہا کہ اپوزیشن نے اپنی چالیں خفیہ رکھی ہیں تو وزیراعظم عمران خان نے بھی اپنے کارڈ سینے کے قریب رکھے ہیں۔

انہوں نے کہا کہ مسلم لیگ (ق) اور ایم کیو ایم پی حکومت کی اتحادی ہیں اور اگر جہانگیر ترین کو بھی آن بورڈ لیا گیا تو وہ بھی مثبت انداز میں جواب دیں گے کیونکہ دوستوں کے درمیان اختلافات نہیں، علیحدگی ہوسکتی ہے۔

ان کا کہنا تھا کہ میں چاہتا ہوں کہ حکومت جہانگیر ترین سے بات کرے۔