اسلام آباد: وائلڈ لائف اینڈ فشریز ڈپارٹمنٹ آزاد جموں و کشمیر کے ذریعے ریسکیو کی جانے والی تیندوا گزشتہ روز دورانِ علاج اسلام آباد میں دم توڑ گئی۔

اسلام آباد وائلڈ لائف مینجمنٹ بورڈ کے منیجر سخاوت علی نے اے پی پی کو بتایا کہ محدود سہولیات کی بناء پر زخمی تیندوے کو ہفتےکی رات آئی ڈبلیو ایم بی کے ریسکیو سینٹر میں تشویشناک حالت میں لایا گیا تھا۔

بول نیوز کی ایک رپورٹ کے مطابق منیجر سخاوت نے مزید بتایا کہ اس کا مکمل ایکسرے اور طبی معائنہ کیا گیا جس کے بعد یہ انکشاف ہوا کہ گولی لگنے کی وجہ سے اس کی کمر ٹوٹ گئی تھی اور دھڑمفلوج ہو گیا ہے۔

وائلڈ لائف حکام کا کہنا ہےکہ تیندوا گولیوں کا نشانہ بننے کے بعد دریا کے قریب پہنچی تھی،تیندوےکی موت گولی لگنے اور ریڑھ کی ہڈی متاثر ہونے کے سبب ہوئی، اس کے جسم میں 6 ایل جی رائفل کے کارتوس پائےگئے۔