مری میں برف باری کے دوران سخت سردی سے ٹھٹر کر کئی اموات واقع ہوگئیں لیکن وزیر اعلی پنجاب پی ٹی آئی کے تنظیمی اجلاس میں شریک ہوئے۔

تفصیلات کے مطابق پاکستان تحریک انصاف کے ہونے والے تنظیمی اجلاس جس کی صدارت شفقت محمود کر رہے تھے اس میں وزیر اعلی پنجاب عثمان بزدار بھی شریک ہوئے۔

جب کہ پی ٹی آئی کا تنظیم سازی کا اجلاس ڈھائی گھنٹے تک جاری رہا جس میں شرکت کے بعد وزیر اعلی نے ہنگامی طور پر صورت حال کا جائزہ لیا۔

تنظیم سازی کے اجلاس میں وزیر اعلی اور گورنر پنجاب سمیت دیگر اہم پارٹی شخصیات نے شرکت کی۔

وزیر اعلی پنجاب نے ایمرجنسی نافذ کردی

وزیر اعلی پنجاب عثمان بزدار نے صورتحال کا جائزہ لیا جس کے بعد حکومت پنجاب کے ٹوئیٹر اکاؤںٹ پر کہا کہ " وزیر اعلیٰ پنجاب نے مری میں ایمرجنسی کے نفاذ کا اعلان کردیا ہے جبکہ شہر کو آفت زدہ قرار دے دیا ہے"

وزیر اعلی نے اپنی ٹوئیٹ میں کیا کہا؟

وزیر اعلی پنجاب عثمان بزدار اپنی ٹوئیٹ میں کہا کہ " مری کےعلاقوں میں تمام اداروں کو برف میں پھنسے شہریوں اور گاڑیوں کو ریسکیو کرنے اور بحفاظت علاقے سے نکالنے کے عمل کو تیز کرنے اور راولپنڈی سے مزید مشینری اور امدادی سامان بھجوانے کےاحکامات دئیے ہیں"

وزیر اعلی پنجاب نے مزید کہا کہ گزشتہ رات 23 ہزار سے زائد گاڑیاں علاقے سے نکالی گئیں اور یہ ریسکیو آپریشن جاری ہے انہو ں نے شہریوں سے اپیل کی کہ پولیس اور ضلعی انتظامیہ کی ہدایات پر سختی سےعمل کریں اور ان سے تعاون کریں۔