اسلام آباد:وزیراعظم عمران خان نے بھی خیبرپختونخوا بلدیاتی انتخابات میں شکست تسلیم کرلی، وزیراعظم نے دوسرے مرحلے سمیت ملک بھر کے بلدیاتی انتخابات کی خود نگرانی کرنے کا اعلان کرتے ہوئے کہا کہ غلط امیدواروں کا انتخاب سب سے بڑا سبب بنا۔
خیبرپختونخوا بلدیاتی انتخابات میں شکست کے بعد وزیراعظم عمران خان نے سماجی رابطے کی ویب سائٹ ٹوئٹر پر اپنے ٹویٹ میں کہا کہ پی ٹی آئی نے خیبرپختونخوا کے بلدیاتی انتخابات کے پہلے مرحلے میں غلطیاں کیں اوراس کی قیمت بھی چکائی۔
PTI made mistakes in 1st phase of KP LG elections & paid the price. Wrong candidate selection was a major cause. From now on I will personally be overseeing PTI's LG election strategy in 2nd phase of KP LG elections & LG elections across Pak. InshaAllah PTI will come out stronger
— Imran Khan (@ImranKhanPTI) December 21, 2021
وزیراعظم نے مزید کہا کہ غلط امیدواروں کا انتخاب سب سے بڑا سبب بنا ، اب سے ذاتی طورپر خیبرپختونخوا کے بلدیاتی انتخابات کی نگرانی کروں گا، دوسرے مرحلے سمیت پورے ملک کے بلدیاتی انتخابات کی نگرانی کروں گا۔
عمران خان نے اس عزم کا اظہار کیا کہ انشاء اللہ آئندہ تحریک انصاف مضبوط بن کرسامنے آئے گی۔
اس وقت اگر پی ٹی آئی کمزور ہوئی تو ملک بھیڑیوں کے ہاتھ لگ جائے گا،فواد چوہدری
ادھر وفاقی وزیراطلاعات فواد چوہدری نے سماجی رابطے کی ویب سائٹ ٹوئٹر پر اپنے ٹوئٹ میں پی ٹی آئی قیادت اور کارکنان کو ذاتی اختلافات پس پشت ڈالنے کی اپیل کرتے ہوئے کہا کہ عمران خان کی قیادت میں خود کومنظم کریں، اس وقت اگر تحریک انصاف کمزور ہوئی تو ملک بھیڑیوں کے ہاتھ لگ جائے گا۔
اگر JUI جیسی شدت پسند جماعتیں PTI کا متبادل ہیں تو واقعی آپ کی بات درست ہے ، PTI کی لیڈرشپ اور کارکنان اس صورتحال میں ذاتی اختلافات کو پس پشت ڈالیں اور عمران خان کی قیادت میں خود کو منظم کریں اس وقت اگر PTI کمزور ہوئ تو ملک بھیڑیوں کے ہاتھ لگ جائیگا https://t.co/3tIXzSzStZ
— Ch Fawad Hussain (@fawadchaudhry) December 21, 2021
فواد چوہدری نے مزیدکہا کہ اگر جے یو آئی جیسی شدت پسند جماعتیں پی ٹی آئی کا متبادل ہیں تو واقعی آپ کی بات درست ہے۔
