سعودی عرب میں ایک شہری نےسکوں کو جمع کرنےکےلئے 20 برس سے زیادہ محنت کی۔اس دوران میں وہ دنیاکےمختلف ممالک میں گیا تا کہ ان سکوں کو جمع کر سکے۔ بات صرف سکے جمع کرنے تک محدود نہیں رہی بلکہ اس شہری نے سکوں کے ذریعے سعودی بادشاہوں کی تصاویر پر مشتمل حیران کن فن پارے تیار کر ڈالے۔

سعودی شہری ہشام النجار نے دنیا بھر میں نوادرات اور نایاب کرنسیوں کے نیلامیوں سے ایک لاکھ سے زیادہ سکے جمع کیے۔

العربیہ ڈاٹ نیٹ سے گفتگومیں النجار نےواضح کیا کہ سکوں کےذریعے فن پاروں کی تیاری کا مقصد ان سکوں کو خوب صورت شکل میں محفوظ کرنا ہے۔اس لئے ایسے فن پارے تیار کیے گئے جو دیکھنے والوں کےلئے پُرکشش ہوں۔

النجار کے مطابق اس نے شاہ سلمان کی تصویر دنیا بھر کے 9 ہزار سے زیادہ سکوں کے ذریعے تیار کی۔

النجار نے مزید بتایا کہ اس کے پاس سکوں سے تیار کی گئیں 40 تصاویر ہیں۔ یہ تصاویر سعودی عرب کے فرمارواؤں اور شہزادوں اور خلیجی ممالک کے شہزادوں کی ہیں۔

النجار نے انکشاف کیا کہ اس آرٹ ورک کے ذریعے وہ دنیا بھر میں سکوں کے ذریعے بنائی گئی سب سے بڑی دیوار نقاشی پیش کرنا چاہتا ہے۔ یہ فن پارہ مکہ مکرمہ یا جدہ یا ریاض یا کسی بھی اور شہر میں ہو سکتا ہے اور النجار اس کے ذریعے گینز بک آف ریکارڈز میں شامل ہونے کا خواہش مند ہے۔