وفاقی وزیر اطلاعات ونشریات چوہدری فواد حسین نے کہا کہ وزیراعظم عمران خان کے اقتصادی وژن کے تناظر میں پاکستان سی پیک منصوبے کو وسط ایشیائی ممالک کے ساتھ ملانے کا خواہاں ہے۔
جمعرات کو دوشنبے میں میڈیا سے گفتگو کرتے ہوئے انہوں نے کہا ہم افغانستان کی موجودہ صورتحال سے پہلے ہی وسط ایشیائی ممالک کی شمولیت پر زور دیتے رہے ہیں۔
انہوں نے کہا تمام وسط ایشیائی ملکوں کے ساتھ ریل اور سڑک کے ذریعے رابطے سے خطے میں روابط میں اضافہ ہوگا۔
وفاقی وزیر نے امید ظاہر کی کہ افغانستان میں صورتحال بہتر ہوگی اور کہا افغانستان میں طالبان حکومت کے ساتھ بین الاقوامی تعاون سے پوری دنیا کو فائدہ ہوگا۔
