بالی ووڈ اداکار پریش راول نے اپنی موت کی جھوٹی خبر پھیلانے والے کو دلچسپ جواب دے ڈالا۔

بھارتی میڈیا کے مطابق ایک انجان شخص کی جانب سے سوشل میڈیا پر نامور اداکار پریش راول کی موت سے متعلق جھوٹی خبر شیئر کی گئی جس میں لکھا گیا ’’ فلم ہیرا پھیری کے اداکار نے آج صبح 7 بجے اپنی زندگی کی آخری سانس لی‘‘۔

لافٹر ہاؤس نامی اکاؤنٹ سے شیئر کی گئی خبر میں بھارت میں حکومتی پارٹی کے رکن پارلیمنٹ پریش راول کی فریم میں تصویر اور اس کے اطراف میں موم بتیاں بھی جلتی ہوئی دکھائی دے رہی ہیں۔

اپنی موت کی افواہ کے ٹویٹ میں جواب دیتے ہوئے پریش راول نے لکھا ’’غلط فہمی کےلیے معذرت چاہتا ہوں، میں 7 بجے کے بعد تک سوتا رہ گیا۔"

اداکار پریش راول نے بالی ووڈ کی کامیاب ترین فلموں میں اداکاری کے جوہر دکھائے تاہم کامیڈی فلم ’ہیرا پھیری‘ کے کردار بابو راؤ سے خوب شہرت پائی اس کے علاوہ وہ فلم سنجو میں سنجے دت کے باپ کا کردار بھی بخوبی ادا کرچکے ہیں۔