نومنتخب امریکی صدر جوبائیڈن نے پینسلوینیا کی خاتون مخنث ڈاکٹر ریچل لیوین کو محکمہ صحت میں معاون سیکریٹری کے عہدے کے لیے نامزد کردیا۔ اس پیشرفت کی توثیق امریکی سینیٹ کی جانب سے کی جائے گی۔

اس نئے عہدے میں ریچل لیوین جوبائیڈن کے انتخاب برائے صحت کے سیکریٹری جیویر بیسیرا اور کورونا وائرس کے جوابی کوآرڈینیٹر جیف زینٹس کے ساتھ کام کریں گی۔

غیر ملکی میڈیا رپورٹس کے مطابق ڈاکٹر ریچل لیوین پہلی مخنث فیڈرل عہدیدار ہوں گی۔ انہوں نے گزشتہ برس پینسلوینیا میں "کورونا رسپانس" کے حوالے سے ترجمان کی حیثیت سے فرائض انجام دیے۔

ڈاکٹر ریچل لیوین کو 2017 میں سیکریٹری صحت مقرر کیا گیا، انہوں نے بتایا کہ محض چند لوگوں کے علاوہ انہیں کبھی صنفی امتیاز کا سامنا نہیں کرنا پڑا۔

ریاست کے گورنر کی جانب سے انہیں فزیشن جنرل مقرر کیا گیا تھا جبکہ اس سے قبل وہ "نوعمری صحت" کے ایک کلینک کی سربراہی کرتی تھیں۔