عالمی وباء کورونا وائرس کا شکار پاکستان کرکٹ ٹیم کے سابق کپتان اور اسٹار آل راؤنڈر شاہد خان آفریدی کا کہنا ہے کہ شروع کے دو تین دن بہت سخت تھے مگر الحدللہ اب بہتر ہوں۔
انہوں نے سوشل میڈیا پر ویڈیو پیغام جاری کرتے ہوئے کہا ہے کہ میں کل سے اپنی صحت کو لے کر افواہیں سُن رہا ہوں تو میں بتانا چاہتا ہوں کہ شروع کے دو تین دن بہت سخت تھے لیکن الحمدللہ جیسے جیسے دن گزرتے گئے ویسے طبیعت بہتر ہوتی جارہی ہے۔
بوم بوم کا کہنا ہے کہ اس بیماری کو بہت زیادہ سر پر چڑھانے کی ضرورت نہیں ہے کیونکہ کسی بیماری سے جب تک آپ خود نہیں لڑیں گے آپ اس کو نہیں ہرا سکتے۔
ان کا مزید کہنا ہے کہ میرے لئے سب سے زیادہ مشکل بات یہ ہے کہ میں اپنے بچوں کو ہاتھ نہیں لگا پارہا اور انہیں پیار نہیں کر پارہا۔
سابق کپتان کا مزید کہنا ہے کہ میں اپنی سب سے چھوٹی بیٹی اروا کو بہت زیادہ مس کررہا ہوں لیکن احتیاط ضروری ہے کیونکہ آپ محفوظ ہیں تو سامنے والا بھی محفوظ رہے گا۔
شاہد آفریدی نے مزید کہا کہ اس بات کا علم تھا کہ مجھے بھی یہ بیماری لگے گی کیونکہ میرا ٹریول بہت زیادہ تھا۔ لیکن میں اس بات پر اللہ کا شکر ادا کرتا ہوں کہ یہ بیماری مجھے پہلے نہیں ہوئی ورنہ میں اتنا ٹریول کرکے عوام کی خدمت نہیں کر پاتا۔
