ویسٹ انڈین کرکٹ بورڈ نے جولائی میں دورہ انگلینڈ کی منظوری دے دی، کورونا وائرس کے باعث کھلاڑیوں اور سپورٹنگ اسٹاف کی تنخواہوں میں 50 فیصد کٹوتی ہوگی۔

انگلینڈ کیخلاف 3 ٹیسٹ میچزکی سیریز کیلئے کرکٹ ویسٹ انڈیز نے رضامندی ظاہرکردی، سیریز کا آغاز 8 جولائی سے ہوگا۔ ویسٹ انڈین ٹیم انگلینڈ پہنچ کر 14 دن قرنطینہ میں رہے گی۔

ٹیسٹ میچز تماشائیوں کے بغیر اور بائیوسیکیور ماحول میں کھیلے جائیں گے، کرکٹ ویسٹ انڈیز کے صدر رکی اسکیرٹ کے مطابق کورونا کی وباء کے باعث عارضی طور پر کھلاڑیوں کی تنخواہوں میں 50 فیصد کٹوتی کا مشکل فیصلہ کیا ہے۔

دوسری جانب انگلینڈ کی ویسٹ انڈیز اور پاکستان کیخلاف ٹیسٹ سیریز کے دوران کورونا وائرس میں مبتلا کھلاڑی کو تبدیل کرنے کی اجازت ملنے کا امکان ہے۔

پلیئنگ کنڈیشنز میں تبدیلی کے حوالے سے انگلش بورڈ کی آئی سی سی سے بات چیت جاری ہے۔