آسٹریلیا کے سابق آل راؤنڈر بریڈ ہوگ نے پاکستان کے مایہ ناز آل راؤنڈر عماد وسیم کو بھارت کے ہاردیک پانڈیا سے بہتر آل راؤنڈر قرار دے دیا۔
گزشتہ روز ٹوئٹر پر بریڈ ہوگ نے اپنے مداحوں سے سوال و جواب کا سلسلہ کیا۔ اس دوران ایک ٹوئٹر صارف نے آسٹریلوی آل راؤنڈر سے سوال کیا کہ عماد وسیم اور ہاردیک پانڈیا کے درمیان (آپ کا پسندیدہ) ذیادہ بہتر آل راؤنڈر کون ہے۔
اس سوال کا جواب دیتے ہوئے ہوگ نے لکھا کہ میں عماد وسیم کا انتخاب کروں گا، لیکن ہاردیک پانڈیا بھی جب انجری سے واپس آئیں گے تو کافی اہمیت کا حامل ہوگا اور امید کرتا ہوں وہ پہلے سے بہتر کارکردگی انجام دیں گے۔
Going to go @simadwasim on this one. But watch out, I have a great feeling @hardikpandya7 when he is fully fit and back in business will deliver better than before. #hoggytime https://t.co/DgXZPAkRsA
— Brad Hogg (@Brad_Hogg) March 27, 2020
عماد وسیم نے اب تک 53 ون ڈے اور 43 ٹی ٹوئنٹی میچز میں پاکستان کی نمائندگی کرتے ہوئے 952 اور 267 رنز اسکور کئے ہیں۔ اس کے علاوہ انہوں نے دونوں فارمیٹ میں 42، 42 وکٹیں بھی حاصل کر رکھی ہیں۔
دوسری جانب ہاریک پانڈیا تینوں فارمیٹ میں بھارتی ٹیم کی نمائندگی کرچکے ہیں۔ انہوں نے 11 ٹیسٹ 54 ون ڈے اور 40 ٹی ٹوئنٹی میں بالترتیب 532، 952 اور 310 رنز اسکور کئے ہیں جبکہ ٹیسٹ میں 17، ونڈے میں 54 اور ٹی ٹوئنٹی میں 38 شکار کئے ہوئے ہیں۔
واضح رہے کہ عماد وسیم کو ہاردیک پانڈیا پر ترجیح دینے والے بریڈ ہوگ نے کینگروز کی نمائندگی کرتے ہوئے 7 ٹیسٹ، 124 ون ڈے اور 15 ٹی ٹوئنٹی میچز کھیلے جس میں بالترتیب 186، 812 اور 54 رنز اسکور کئے۔ اس کے علاوہ لیفٹ آرم چائنا مین نے ٹیسٹ میں 17، ون ڈے میں 157 اور ٹی ٹوئنٹی کرکٹ میں 7 شکار بھی کئے۔
