گذشتہ روز برطانیہ کے ایک خبر رساں ادارے نے وزیراعظم عمران خان کے کورونا وائرس میں مبتلا ہونے کی خبر نشر کی، جس سے سوشل میڈیا پر افواہوں کا بازار سرگرم ہوگیا۔
افواہوں میں غیر ملکی خبر رساں ادارے کا حوالہ دیتے ہوئے کہا جا رہا ہے کہ وزیراعظم عمران خان کا کورونا وائرس کا ٹیسٹ مثبت آگیا ہے۔
ان افواہوں کا جواب دیتے ہوئے سینیٹر فیصل جاوید نے کہا کہ وزیراعظم عمران خان سے متعلق کورونا کے مثبت ٹیسٹ کی خبر غلط ہے، براہ کرم فیک نیوز پھیلانے سے گریز کریں، اللہ سب کو سلامت رکھے۔
وزیر اعظم عمران خان سے متعلق
کورونا کے مثبت ٹیسٹ کی خبر الحمدللہ غلط ہے -
براہ کرم فیک نیوز پھیلانے سے گریز کریں۔
اللہ تعالیٰ سب کو سلامت رکھے۔ دعائیں 🙏— Faisal Javed Khan (@FaisalJavedKhan) March 27, 2020
اسی حوالے سے پاکستان تحریک انصاف کے رہنما ڈاکٹر شہباز گل نے کہا ہے کہ برطانوی چینل نے غلطی سے وزیر اعظم عمران خان کے کورونا وائرس میں مبتلا ہونے کی خبر چلائی۔
اپنے ایک ٹویٹ میں ڈاکٹر شہباز گل نے کہا کہ برطانوی ٹی وی کی جانب سے اپنے وزیر اعظم کے کورونا میں مبتلا ہونے کی خبر چلائی جانی تھی لیکن انہوں نے غلطی سے وزیر اعظم عمران خان کا نام لکھ دیا۔ اللہ کے کرم سے خان صاحب بالکل ٹھیک ہیں اور ابھی تھوڑی دیر پہلے دفتر سے گھر گئے ہیں۔
برطانوی اخبار نے غلطی سے وزیراعظم عمران خان کا نام لکھ کر غلط خبر چلا دی کہ ان کا کرونا ٹیسٹ + آیا ہے۔انہوں نے برطانوی وزیراعظم کا نام لکھنا تھا غلطی سے خان صاحب کا لکھا اللہ کے کرم سے خان صاحب بلکل ٹھیک ہیں اور ابھی تھوڑی دیر پہلے دفتر سے گھر گئے ہیں https://t.co/Jjbc12GOrA
— Dr. Shahbaz GiLL (@SHABAZGIL) March 27, 2020
خیال رہے کہ برطانوی وزیر اعظم بورس جانسن میں کورونا وائرس کی تصدیق ہوئی ہے جس کے بعد انہوں نے خود کو قرنطینہ کرلیا ہے۔ بورس جانسن نے اپنے ایک ویڈیو پیغام میں کہا ہے کہ وہ ویڈیو کانفرنس کے ذریعے کورونا کے خلاف قومی جنگ کی قیادت کرتے رہیں گے۔
