واشنگٹن: امریکا نے کورونا وائرس سے لڑتے ایران کو اچانک بڑا جھٹکا دے دیا۔
امریکا نے امداد کا وعدہ کرنے کے بعد تازہ ترین پابندیاں عائد کردیں۔ اس سے قبل امریکا نے ایران کو کورونا وائرس کیخلاف امداد دینے کی پیشکش کی تھی اور ایران میں قید امریکیوں کی رہائی کا مطالبہ کیا تھا۔
برطانوی خبررساں ادارے رائٹرز کے مطابق امریکا نے ایرانی تیل کے بدلے ہونے والی ٹرانزیکشن کی وجہ سے ایرانی پیٹروکیمیکل سے وابستہ تین افراد سمیت جنوبی افریقہ، ہانگ کانگ اور چین سے منسلک 9 افراد اور اداروں پر پابندیاں عائد کی ہیں۔
امریکی وزیرخارجہ مائیک پومپیو نے ایران پر اقتصادی پریشر میں مزید اضافے کے عزم کا بھی اظہار کیا ہے۔
منگل کو واشنگٹن میں نیوز کانفرنس کرتے ہوئے امریکی وزیر خارجہ مائیک پومپیو نے بتایا کہ ایران امریکی شہریوں کی رہائی پر غور کررہا ہے۔ تاہم امریکا ایران پر زیادہ سے زیادہ دباؤ کی پالیسی جاری رکھے گا۔
اس کے ساتھ ساتھ امریکی وزیرخارجہ نے ایران کو کورونا وائرس سے لڑنے میں مدد دینے کی دوبارہ بھی بات کی۔
دوسری جانب اسلامی جمہوریہ ایران کے وزیر خارجہ محمد جواد ظریف نے اپنے ٹوئٹر پیغام میں امریکی پابندیوں کی وجہ سے ایران میں کورونا کے خلاف اقتصادی وسائل کم ہونے کی جانب اشارہ کرتے ہوئے کہا امریکی حقیقی معنوں میں معصوم انسانوں کا قتل کر رہے ہیں۔
Unlawful US sanctions drained Iran's economic resources, impairing ability to fight #COVID19.
They literally kill innocents
It is immoral to observe them: doing so has never saved anyone from future US wrath
Join the growing global campaign to disregard US sanctions on Iran.
— Javad Zarif (@JZarif) March 17, 2020
جواد ظریف نے امریکی پابندیوں پر عمل کرنے والے ممالک کو مخاطب کرتے ہوئے کہا کہ امریکی اقدامات کا خاموش بیٹھ کر نظارہ کرنا غیر اخلاقی عمل ہے اور ایسا کرنے سے کوئی بھی مستقبل کے امریکی غضب سے نہیں بچ سکتا۔
ایران کے وزیر خارجہ نے ہفتہ کے روز بھی ایک ٹوئٹر پیغام میں ایران مخالف امریکی پابندیوں پر تنقید کرتے ہوئے عالمی برادری اور دنیا سے مطالبہ کیا تھا کہ وہ ایرانی قوم کے خلاف امریکی طبی دہشتگردی کے سامنے خاموش نہ رہیں۔
واضح رہے کہ گزشتہ دو سالوں کے دوران ایرانی عوام، امریکا کی جانب سے لگائی گئی انتہائی سخت پابندیوں کا شکار ہیں اور امریکی دعووں کے برعکس طبی اور ادویات کی سہولیات کی فراہمی میں ان کو بہت مشکلات کا سامنا ہے۔
