وزیراعظم عمران خان کہتے ہیں پاکستانی قوم نے ہرمشکل کا مقابلہ خندہ پیشانی  اور ثابت قدمی سے کیا ہے اور انشا اللہ کورونا وائرس کے خلاف بھی  قومی سطح پر مشترکہ کاوش سامنے آئے گی۔

وزیراعظم کی زیرصدارت نیشنل کوآرڈینیشن کمیٹی کا اجلاس ہوا۔ اجلاس میں  کورونا کی روک تھام کے حوالے سے اقدامات پر غور کیا گیا۔

اجلاس میں تمام وزرائے اعلیٰ وڈیولنک کے ذریعے اجلاس میں شریک ہوئے۔ کورونا کی روک تھام کے لیے مختلف تجاویز پیش کی گئیں۔ وزیراعلیٰ سندھ کی جانب سے تجویز دی گئی کہ بین الصوبائی نقل وحرکت محدود کی جانی چاہئیں۔ وفاق نے تجویز پرمزید مشاورت کا فیصلہ کیا۔

وزیراعظم نے کہا۔ حکومت کو کورونا کے مسئلے کی سنجیدگی کا مکمل ادراک ہے۔ اس ضمن میں حکومتی سطح پر ہر ممکن اقدام کیا جائے گا۔ عوام کو اس مسئلے کی سنجیدگی سے متعلق آگاہی کی ضرورت ہے۔ ضرورت ہے کہ عوام ازخودرضاکارانہ حفاظتی تدابیراختیار کریں۔

وزیراعظم نے کہا کہ پاکستانی قوم ہرمشکل میں ثابت قدم رہی۔ کورونا سے ڈرنا نہیں بلکہ من الحیثت القوم اس مسئلے کا مقابلہ کرنا ہے۔