ملتان: پاکستان سپر لیگ سیزن فائیو کے بارہویں میچ میں ملتان سلطانز نے کوئٹہ گلیڈی ایٹرز کو 30 رنز سے شکست دے دی۔

تفصیلات کے مطابق ملتان میں کھیلے گئے میچ میں کوئٹہ کی ٹیم 200 رنز کے ہدف کے تعاقب میں 7 وکٹوں کے نقصان پر 169 رنز بناسکی۔ شین واٹسن 80 رنز بناکر ٹاپ اسکورر رہے۔

اس کے علاوہ جیسن رائے نے بھی 30 رنز کی اننگز کھیلی مگر کوئی بھی بلے باز خاطر خواہ کارکردگی نہ دکھا سکا۔

ملتان سلطانز کی جانب سے بلاول بھٹی نے تین، عمران طاہر نے دو اور خوشدل شاہ نے ایک کھلاڑی کو پویلین روانہ کیا۔

اس سے قبل ملتان سلطانز نے ٹاس جیت کر پہلے بیٹنگ کرتے ہوئے مقررہ 20 اوورز میں رائلی روسو کی جارحانہ سینچری کی بدولت 5 وکٹوں کے نقصان پر 199 رنز اسکور کئے تھے۔

رائلی روسو نے 43 گیندوں پر پی ایس ایل کی تاریخ کی تیز ترین سینچری بنائی جبکہ کپتان شان مسعود 46 اور جیمز وِنس بھی 29 رنز بناکر نمایاں رہے تھے۔

کوئٹہ کی جانب سے محمد نواز، محمد حسنین، بین کٹنگ، نسیم شاہ اور سہیل خان نے ایک ایک وکٹ لی تھی۔

ملتان سلطانز کے رائلی روسو کو 100 رنز کی ناقابل شکست اننگز کھیلنے پر میچ کا بہترین کھلاڑی قرار دیا گیا۔