ملتان: پاکستان سپر لیگ سیزن فائیو کے آٹھویں میچ میں ملتان سلطانز نے پشاور زلمی کو باآسانی 6 وکٹوں سے شکست دیدی۔ 

تفصیلات کے مطابق ملتان کرکٹ اسٹیڈیم میں کھیلے گئے میچ میں ملتان سلطانز کی ٹیم نے پشاور زلمی کی جانب سے دیا گیا 124 رنز کا ہدف 4 وکٹوں کے نقصان پر 15 ویں اوور میں حاصل کرلیا۔

رائلی روسو نے ناٹ آؤٹ 49 جبکہ خوشدل شاہ نے ناقابل شکست 43 رنز کی اننگز کھیلیں۔ اس کے علاوہ ذیشان اشرف 12 رنز بناسکے۔

پشاور زلمی کی جانب سے وہاب ریاض نے دو جبکہ حسن علی اور راحت علی نے ایک ایک وکٹ لی۔

اس سے قبل ملتان سلطانز کی دعوت پر پہلے بیٹنگ کرتے ہوئے پشاور زلمی کے بلے باز بے بس نظر آئے اور پوری ٹیم صرف 123 رنز کے اسکور پر ہی آل آؤٹ ہوگئی تھی۔

پشاور زلمی کی جانب سے حیدر علی نے 47، لیام ڈوسن نے 22 اور کامران اکمل نے 17 رنز اسکور کئے تھے۔ اس کے علاوہ کوئی بھی بلے باز ڈبل فیگر میں بھی داخل نہ ہوسکا تھا۔

ملتان سلطانز کے سہیل تنویر نے چار، محمد عرفان اور محمد الیاس نے دو دو جبکہ شاہد آفریدی اور عمران طاہر نے ایک ایک کھلاڑی کو پویلین روانہ کیا تھا۔

ملتان سلطانز کے سہیل تنویر کو 4 وکٹیں لینے پر میچ کا بہترین کھلاڑی قرار دیا گیا۔