ملتان: پاکستان سپر لیگ سیزن فائیو کے آٹھویں میچ میں ملتان سلطانز نے پشاور زلمی کی بیٹنگ لائن کے پرخچے اُڑادیئے اور محض 123 رنز پر آل آؤٹ کردیا۔

تفصیلات کے مطابق ملتان کرکٹ اسٹیڈیم میں کھیلے جارہے میچ کا ٹاس ملتان سلطانز کے کپتان شان مسعود نے جیتا اور پہلے پشاور زلمی کو بیٹنگ کی دعوت دی۔

پشاور زلمی کے بلے باز ملتان سلطانز کے گیند بازوں کے سامنے بے بس نظر آئے اور پوری ٹیم صرف 123 رنز کے اسکور پر ہی آل آؤٹ ہوگئی۔

پشاور زلمی کی جانب سے حیدر علی نے 47، لیام ڈوسن نے 22 اور کامران اکمل نے 17 رنز اسکور کئے۔ اس کے علاوہ کوئی بھی بلے باز ڈبل فیگر میں بھی داخل نہ ہوسکا۔

ملتان سلطانز کے سہیل تنویر نے چار، محمد عرفان اور محمد الیاس نے دو دو جبکہ شاہد آفریدی اور عمران طاہر نے ایک ایک کھلاڑی کو پویلین روانہ کیا۔