پشاور زلمی کا اپنے فینز کیلئے بڑا اعلان، زلمی کے بقیہ تمام میچز کیلئے کرنل شیر خان اسٹیڈیم میں فیملیز کیلئے بڑی اسکرین اور راولپنڈی میں ہونے والے پشاور زلمی کے 5 میچز کیلئے پشاور سے راولپنڈی خصوصی زلمی فینز بس چلے گی۔
پشاور کے صحافیوں کو بھی خصوصی زلمی بس میں میچ کوریج کیلئے راولپنڈی لایا جائے گا۔ چیئرمین پشاور زلمی جاوید آفریدی کا کہنا ہے کہ اگلے سال انشاللہ پشاور زلمی اپنے میچز ارباب نیاز اسٹیڈیم میں کھیلے گی۔
پشاور میں زلمی فینز کیلئے جہاں 26 مارچ سے پشاور میں بڑی اسکرینز لگائی جائیں گی وہیں راولپنڈی میں شیڈول پشاور زلمی کے 5 میچز کیلئے پشاور سے راولپنڈی ڈائیوو کی خصوصی بس سروس بھی چلائی جائے گی۔
پشاور زلمی کے آئندہ تمام میچز کیلئے پشاور کے کرنل شیر خان (آرمی اسٹیڈیم) میں بڑی اسکرین لگائی جائے گی اور فیملیز میچ کے ساتھ فوڈ اسٹالز سے بھی لطف اٹھاسکیں گے۔
اس کے علاوہ راولپنڈی میں ہونے والے 5 زلمی میچز کیلئے پشاور سے راولپنڈی اور میچ کے فوری بعد راولپنڈی سے پشاور بس سروس چلائی جائے گی۔ میچ ٹکٹ ہولڈرز ایک ساتھ ڈائیوو کی اسپیشل زلمی فینز بس میں ٹکٹ خرید کر سفر کرسکیں گے۔
اس کے علاوہ پشاور کے وہ صحافی جنہیں پی سی بی نے میڈیا ایکریڈیشن جاری کی ہیں وہ زلمی فینز بس میں پشاور زلمی کے مہمان کے طور پر میچ کوریج پر جاسکیں گے۔
پشاور زلمی کے چیئرمین جاوید آفریدی کا کہنا کہ وہ زلمی فینز کے شکر گزار ہیں جن کی بدولت پشاور زلمی پی ایس ایل کا سب بڑا برانڈ ہے۔ ان فینز کیلئے پشاور میں بڑی اسکرین اور زلمی بس سروس شروع کرنے کا مقصد یہی ہے کہ زلمی فینز مل کر میچز سے لطف اٹھائیں۔
انہوں نے مزید کہا کہ انشاللہ اگلے سال پشاور زلمی اپنے میچز ارباب نیاز اسٹیڈیم پشاور میں کھیلے گی اور انشاللہ پورے خیبر پختونخواہ اور پشاور میں کرکٹ کے جشن کا سماں ہوگا۔
