گزشتہ دنوں پشاور زلمی کے کپتان ڈیرن سیمی کو پاکستان میں کرکٹ کی بحالی کیلئے ان کی خدمات پر پاکستان کی اعزازی شہریت اور اعلیٰ ترین سویلین ایوارڈ 'نشانِ پاکستان' دینے کا اعلان کیا گیا تو بھارتی ویب سائٹ 'انڈیا ٹوڈے' نے اس ایوارڈ کا نام تبدیل کرکے اسے اعلیٰ ترین فوجی اعزاز 'نشانِ حیدر' میں بدل دیا۔

پاکستان کی جانب سے شہریت اور اعلیٰ ترین سویلین ایوارڈ دینے کے اعلان پر دنیا بھر کے مختلف چینلز اور اخبارات میں اس خبر کو چلایا گیا مگر بھارتی ویب سائٹ نے خبر شائع کرتے ہوئے ایک بڑی غلطی کر ڈالی۔ بھارتی میڈیا نے پاکستان کے اعلیٰ ترین سویلین ایوارڈ ’نشانِ پاکستان‘ کو ’نشانِ حیدر‘ ہی قرار دے دیا۔

پاکستان کا سب سے بڑا سویلین ایوارڈ 'نشانِ پاکستان' جبکہ سب سے بڑا ملٹری ایوارڈ 'نشانِ حیدر' ہے۔

بھارتی میڈیا نے اپنی خبر میں لکھا کہ '23 مارچ 2020 کو حکومتِ پاکستان کی جانب سے ویسٹ انڈین کرکٹر ڈیرن سیمی کو 'نشانِ حیدر' سے نوازا جائے گا'۔