کراچی: ایشیاء کپ 2008 کے بعد پاکستان میں سب سے بڑے کرکٹ میلے ایچ بی ایل پی ایس ایل 2020 میں کُل 10 لاکھ امریکی ڈالرز کی مالیت کی انعامی رقم تقسیم کی جائے گی۔
ایونٹ کا فائنل 22 مارچ کو قذافی اسٹیڈیم لاہور میں کھیلا جائے گا۔ فائنل کی فاتح ٹیم ایونٹ کی چمچماتی ٹرافی کے ہمراہ 5 لاکھ امریکی ڈالرز (جو تقریباً 7 کروڑ 72 لاکھ 300 روپے بنتی ہے) کی حقدار ٹھہرے گی۔
ایونٹ کی رنرز اپ ٹیم 2 لاکھ امریکی ڈالرز کی انعامی رقم وصول کرے گی۔
اس کے علاوہ ایونٹ کے دوران ہر میچ کے بہترین کھلاڑی کو مین آف دی میچ کا ایوارڈ دیا جائے گا۔ ایونٹ میں کل 34 میچز کھیلے جائیں گے۔ ہر میچ کا بہترین کھلاڑی 4500 امریکی ڈالرز پر مشتمل انعامی رقم وصول کرے گا۔
-80 ہزار امریکی ڈالرز مالیت کی انعامی رقم ایونٹ کے بہترین کھلاڑی، بہترین بلے باز، بہترین باؤلر اور اسپرٹ آف کرکٹ کے ایوارڈز جیتنے والوں میں برابری کی بنیاد پر تقسیم ہوگی۔
باقی ماندہ انعامی رقم ٹورنامنٹ کے دوران بہترین کیچ، بہترین رن آؤٹ اور سب سے زیادہ چھکے لگانے والے کھلاڑیوں کے لیے مقررہ انعامات کی مد میں تقسیم کی جائے گی۔
-34 میچز پر مشتمل 32 روزہ ایونٹ، ایچ بی ایل پی ایس فائیو، ایشیاء کپ 2008 کے بعد پاکستان میں کرکٹ کا سب سے بڑا میلہ ہے۔ 12 سال قبل 4 ٹیسٹ کھیلنے والے ممالک کے علاوہ متحدہ عرب امارات اور ہانگ کانگ کی ٹیموں پر مشتمل ایونٹ لاہور اور کراچی میں کھیلا گیا تھا۔
ایشیاء کپ 2008 میں کُل 13 میچز کھیلے گئے تھے۔ ایونٹ کے فائنل میں سری لنکا نے بھارت کو 100 رنز سے شکست دی تھی۔
اس سے قبل پاکستان، آئی سی سی کرکٹ ورلڈکپ 1987 اور 1996 کے میچوں کی میزبانی بھی کرچکا ہے۔ ورلڈکپ 1987 میں پاکستان نے 7 مختلف مقامات پر 10 میچوں کی میزبانی کی تھی۔
ورلڈ کپ 1996 میں پاکستان نے 6 مختلف مقامات پر 16 میچوں کی میزبانی کی تھی۔
ایچ بی ایل پی ایس ایل 2020 ایک ڈومیسٹک ٹورنامنٹ ہے جو ملک کے 4 مختلف شہروں میں کھیلا جائے گا۔ ایونٹ کے 9 میچز کراچی، 14 لاہور، 8 راولپنڈی اور 3 ملتان میں کھیلے جائیں گے۔
ایونٹ کا افتتاحی میچ 20 فروری کو دفاعی چیمپئن کوئٹہ گلیڈی ایٹرز اور 2 مرتبہ کی چیمپئن اسلام آباد یونائیٹڈ کے مابین کھیلا جائے گا۔ میچ 9 بجے نیشنل اسٹیڈیم کراچی میں شروع ہوگا، اس سے قبل 6 بج کر 45 منٹ پر ایونٹ کی افتتاحی تقریب کا آغاز ہوگا۔
لیگ کے لیے ٹکٹوں کی آن لائن بکنگ www.yayvo.com پر دستیاب ہے جبکہ شائقین کرکٹ ٹی سی ایس کے ایکسپریس سنٹرز سے بھی ٹکٹ خرید سکتے ہیں۔
