مسلم لیگ نون کے صدر شہباز شریف اور جے یو آئی ایف کے سربراہ مولانا فضل الرحمان کی لاہور میں اہم بیٹھک ہوئی ہے، شہباز شریف نے مولانا کے آزادی مارچ میں شرکت کا اعلان کردیا۔ وہ کہتے ہیں 31 اکتوبر کو اسلام آباد میں جلسہ ہو گا اور آئندہ کے لائحہ عمل کا بھی اعلان کیا جائے گا۔
ماڈل ٹاؤن لاہور میں شہباز شریف اور مولانا فضل الرحمان کے درمیان ملاقات میں آزادی مارچ کے حوالے سے طویل صلاح مشورہ ہوا۔ میٹنگ کے بعد شہباز شریف نے مولانا کے ساتھ پریس کانفرنس میں اعلان کیا کہ 31 اکتوبر کو مسلم لیگ ن آزادی مارچ میں بھرپور شرکت کرے گی اور وہ اسلام آباد میں جلسے سے خطاب کریں گے۔
اپوزیشن لیڈر نے حکومت پر کڑی تنقید کرتے ہوئے اسے معیشت کی زبوں حالی کا ذمہ دار قرار دیا۔ اور ساتھ ہی دعوی کیا کہ اگر آئندہ شفاف انتخابات ہوئے اور انھیں موقع ملا تو وہ چھ ماہ میں معیشت کو بحال کر دیں گے۔
مولانا فضل الرحمان نے کہا کہ 27 اکتوبر کو یوم یکہجتی کشمیر ہے اور اسی روز آزادی مارچ میں شرکت کیلئے ملک کے طول عرض سے قافلے روانہ ہوں گے جو 31 مارچ کو اسلام آباد پہنچیں گے۔ اگر حکومت مذاکرات چاہتی ہے تو پہلے مستعفی ہو۔
مشترکہ پریس کانفرنس کے اختتام پر دونوں راہنما صحافیوں کے سوالوں کے جواب دئیے بغیر ہی روانہ ہو گئے۔
