لاہور: پاکستان ڈویلپمنٹ اسکواڈ نے عمان ہاکی ٹیم کو چار میچز کی سیریز کے پہلے میچ میں سات صفر سے شکست دے کر ایک صفر کی برتری حاصل کرلی۔

نیشنل ہاکی اسٹیڈیم لاہور میں کھیلے گئے میچ میں پاکستانی ٹیم آغاز سے ہی بہتر کھیلی اور اس نے مہمان ٹیم کے خلاف وقفے وقفے سے گولز کرنے کا سلسلہ جاری رکھا اور میچ سات صفر سے جیت لیا۔

پاکستان کی جانب سے رانا عبدالوحید نے ہیٹرک جبکہ رانا سہیل، حماد انجم، رضوان علی اور امجد علی خان نے ایک ایک گول کیا۔

اس موقع پر اولمپیئن چوہدری اختر رسول نے کہا کہ نوجوان کھلاڑیوں میں بہتری کی بہت گنجائش ہے۔

مہمان ٹیم کے ہیڈ کوچ اولمپئن طاہر زمان نے کہا کہ اس دورہ سے ان کی ٹیم کو سیکھنے کا موقع ملے گا۔

واضح رہے کہ سیریز کا دوسرا میچ کل (2 اکتوبر) کو نیشنل ہاکی اسٹیڈیم لاہور میں ہی کھیلا جائے گا۔