English

Aaj Logo

Watch Live
☰
✕
اپ ڈیٹ 28 ستمبر 2019 07:40am

ڈونلڈ ٹرمپ کا مودی کو نیا لقب، بھارت میں زبردست بحث چھڑ گئی

سفیر الہٰی

ٹیکساس: امریکی صدر کی جانب سے مودی کو "بابائے ہندوستان" (Father of India) کا لقب دینے پر بھارت میں ایک نئی بحث شروع ہوگئی ہے۔

بھارتی میڈیا میں یہ بحث شدت اختیار کر گئی ہے کہ امریکی صدر ڈونلڈ ٹرمپ مودی کی تعریف کرتے ہیں یا مذاق اڑاتے ہیں یا طنز کے تیر برساتے ہیں۔

امریکی صدر نے ملاقات کے دوران کہا تھا کہ نریندر مودی " فادر آف انڈیا" ہیں۔ جس پر بھارتی مسلمان سیاستدان اسدالدین اویسی نے ٹرمپ کو "جاہل" قرار دیتے ہوئے کہا کہ ٹرمپ کو آزادی کی جدوجہد کا بالکل بھی علم نہیں، مودی کو گاندھی سے ملایا نہیں جاسکتا۔

اس سے قبل ٹرمپ نے کہا تھا کہ مودی اتنے مقبول ہیں جیسے امریکا کے معروف گلوکار اور اداکار ایلوس ایرون پریسلے تھے۔

صدر ٹرمپ نے دو ماہ میں دوسری مرتبہ ایسی مثال دی ہے جس کی وجہ سے بھارتیوں کو ان کی نیت پر شک ہونے لگا ہے، کیونکہ اگر وہ ابراہم لنکن یا کینیڈی سے تشبیہ دیتے تو بھارت کو اچھا لگتا۔

بھارتی میڈیا نے اپنی وزارت خارجہ کو مشورہ دیا ہے کہ وہ اس بات کا فوری نوٹس لے اور امریکی انتظامیہ تک یہ بات پہنچائی جائے تاکہ کسی اور ملک کا سربراہ ایسی ہمت نہ کرے، کسی بھی ملک کے سربراہ کا موازنہ کسی اداکار یا گلوکار سے کرنا مناسب نہیں۔

بھارتی خبر رساں ایجنسی کے مطابق 26 اگست 2019 کو بھی مشترکہ پریس کانفرنس کے دوران صدر ٹرمپ نے نریندر مودی کے جواب نہ دینے پر کہا تھا کہ حقیقت میں ان کی انگریزی بہت اچھی ہے لیکن وہ اس وقت بات کرنا نہیں چاہتے۔

بھارتی میڈیا کے مطابق صدر ٹرمپ کے اس طرح کے عمل کو کسی بھی طرح دوستی کا نام نہیں دیا جا سکتا کیونکہ دو ممالک کے تعلقات میں سربراہوں کی دوستی کوئی معنی نہیں رکھتی۔

اس کے برعکس صدر ٹرمپ نے وزیراعظم عمران خان سے دونوں مرتبہ ہونے والی ملاقات میں نہایت مؤدبانہ طریقہ اپنایا اور اس مرتبہ تو انہیں اہم ترین سفارتی مشن بھی سونپا ہے جس پر خود ان کی اپنی سیاسی زندگی کا بڑی حد تک انحصار ہے۔

Read Comments