مختلف اقسام کے کھانے بنانے میں ماہرپاکستان کرکٹ بورڈ کے ایگزیکٹو شیف کاظم حسین گزشتہ تیرہ برس سے نیشنل کرکٹ اکیڈمی لاہورمیں ذمہ داریاں نبھا رہے ہیں اور قومی کھلاڑیوں اورکوچنگ اسٹاف کیلئے ان کے من پسند کھانے تیار کرتے ہیں۔ این سی اے کے ساتھ ساتھ ہوم سیریز کے دوران نجی ہوٹل میں رہائش اختیار کرنے والے قومی کرکٹرز کی اکثریت کاظم حسین کے ہاتھ سے بنے پکوان کی فرمائش کرتی ہے۔
کاظم حسین کے مطابق سابق کپتان شعیب ملک کو کھانےمیں پاستا بہت پسند ہے۔ ان کی فرمائش پر انہیں گرین چلی سے بنا پاستا پیش کیا جاتا ہے۔ دراز قد محمد عرفان خوش خوراک ہیں تاہم امام الحق اپنی ڈائیٹ کا خاص خیال رکھتے ہیں۔ امام دوپہر کےکھانے میں پھل اور دہی پر ہی اکتفاء کرتے ہیں۔
این سی اے میں موجود غیرملکی کوچز کے لیے ان کی فرمائش پر بھی مخصوص کھانے تیار کیے جاتے ہیں۔ عام طور پر وہ لزانیہ اور پاستا کھانے کے شوقین ہوتے ہیں۔
کاظم حسین کہتےہیں کہ خوراک کی تیاری میں کھلاڑیوں کے لیے پروٹین، کاربوہائیڈریٹس سمیت دیگر ضروری اجزاء کی خاص مقدار کو پیش نظر رکھا جاتا ہے۔
کاظم حسین نے کہا کہ وہ انتخاب عالم، وسیم باری، سرفراز نواز اور راشد لطیف سمیت کئی نامور کرکٹرز کو کھانا کھلا چکا ہیں مگر ان کی خواہش وزیراعظم پاکستان عمران خان کواپنے ہاتھ سے تیارپکوان پیش کرنے کی ہے۔ انہوں نے کہا کہ پیٹرن ان چیف پی سی بی کو کھانے کھلانے کی خواہش ہمیشہ رہے گی۔
