آپ نے عدالت کی تاریخ میں کئی انوکھے کیسز سنے ہونگے مگر آج ہم آپ کو کراچی کی مقامی عدالت میں سنائے گئے ایک ایسے فیصلے کے بارے میں بتانے جارہے ہیں جسے جان کر آپ کو واقعی حیرانی ہوگی۔
کراچی کی مقامی عدالت نے ایک بلی کے قتل کیس کا فیصلہ سنایا ہے جس میں ناکافی شواہد کی وجہ سے ملزمہ کو بری کردیا گیا۔
رواں برس فروری میں کراچی کے پوش علاقے ڈیفنس کے ایک شہری کی پالتو بلی ایک خاتون کی گاڑی کے نیچے آکر ہلاک ہوگئی تھی، تاہم بلی کے مالک نے اس خاتون کیخلاف مقدمے کے اندراج کیلئے سٹی کورٹ میں درخواست دائر کی تھی۔
شہری کی درخواست پر عدالت نے خاتون کیخلاف مقدمہ درج کرنے کا حکم دیا تھا اور اب ناکافی شواہد کی بناء پر عدالت نے ملزمہ کو بری کردیا ہے۔
عدالت کا اپنے فیصلے میں کہنا تھا کہ ملزمہ اور مدعی دونوں ہی کی جائے وقوع پر موجودگی کے ثبوت نہیں لہٰذا کیس پر مزید کارروائی عدالتی وقت کا ضیاع ہے۔
عدالتی فیصلے میں کہا گیا کہ اس بات کا کوئی ثبوت نہیں ملا کہ خاتون نے بلی کو جان بوجھ کر ہلاک کیا، بلی کسی کی ملکیت نہیں تھی لہٰذا اس کی قیمت کا تعین بھی نہیں کیا جاسکتا۔
فیصے کے مطابق بلی کی ہلاکت ایک پراسرار واقعہ ہے جس میں مدعی ہی کیس کا واحد گواہ ہے۔
