کرسٹیانو رونالڈو کا کہنا ہے کہ وہ اپنی گرل فرینڈ جیورجینا روڈریگز سے ضرور شادی کریں گے۔

یووینتس کے عالمی شہرت یافتہ فٹبالر کا کہنا ہے کہ ماڈل گرل جیورجینا میری زندگی کا پیار ہیں اور میں مستقبل میں ان سے شادی کا ارادہ رکھتا ہوں۔

ایک انٹرویو کے دوران گفتگو کرتے ہوئے سپر اسٹار فٹبالر کا کہنا تھا کہ جیورجینا سے شادی کرنے کی وجہ سے میری والدہ بھی خوش ہو جائیں گی۔ انہوں نے میری بہت مدد کی ہے اور ہاں میں ان سے محبت کرتا ہوں۔

انہوں نے انٹرویو میں مزید کہا کہ ہم ایک دن ضرور شادی کریں گے کیونکہ یہ میری ماں کا خواب بھی ہے، وہ میری دوست ہیں، ہم ایک دوسرے سے باتیں کرتے ہیں، میں نے ان کیلئے اپنے دل کا دروازہ کھولا اور انہوں نے میرے لئے اپنے دل کا روازہ کھولا۔

یہ دونوں 2016 سے ایک دوسرے کے ساتھ ہیں، ان کی پہلی ملاقات ایک معروف برانڈ کی برانچ پر ہوئی جہاں جیورجینا سیلز اسسٹنٹ کے طور پر کام کررہی تھیں اور پھر ان کی ملاقات ایونٹ پر ہوئی۔

کچھ عرصہ قبل رونالڈو سے متعلق گفتگو کرتے ہوئے ان کی گرل فرینڈ کا کہنا تھا کہ کسی ایسے انسان کا پارٹنر ہونا جو بہت زیادہ مشہور ہو آسان نہیں ہے، لیکن میں دنیا کیلئے خود کو نہیں بدلوں گی۔ میں ان کیلئے کیا محسوس کرتی ہوں یہ سب سے اہم ہے۔

واضح رہے کہ رونالڈو کے چار بچے ہیں جن میں ایلانا مارٹینا، ایوا ماریا، کرسٹیانو رونالڈو جونیئر اور میٹیو رونالڈو شامل ہیں۔