سری لنکن کرکٹ ٹيم کے دورہ پاکستان پر خدشات کے بادل منڈلانے لگے۔ پی سی بی سری لنکن بورڈ کو منانے میں مصروف ہے، ایک بار پھر فول پروف سیکیورٹی فراہم کرنے کی یقین دہانی کرادی، سری لنکن بورڈ کو اپنی حکومت سے گرین سگنل کا انتظار ہے۔

سری لنکن ٹیم کا دورہ پاکستان پر غیریقینی کی صورتحال ہے جس کی وجہ سے پاکستان کرکٹ بورڈ پریشانی کا شکار ہوگیا۔

سری لنکن بورڈ نے اسکواڈز کا اعلان تو کردیا ہے لیکن سیکیورٹی پر تحفظات بھی کردیئے اور گیند اب اپنی حکومت کے کورٹ میں ڈال دی۔

اس صورتحال میں پی سی بی نے ہاتھ مارنا شروع کردیئے، ذرائع کے مطابق سری لنکن بورڈ کو سیکیورٹی کی ایک بار پھر یقین دہانی کرائی گئی ہے۔

واضح رہے کہ آج سری لنکا کیخلاف سیریز کیلئے قومی ٹی ٹوینٹی ٹیم کا اعلان کیا جانا تھا مگر غیریقینی کے باعث اسے ملتوی کردیا گیا، اس کے علاوہ اگر سری لنکن ٹیم نہ آئی تو سیریز ملتوی کردی جائے گی۔