پاکستان کرکٹ بورڈ کی جانب سے قومی کرکٹ ٹیم کے سابق ہیڈ کوچ مکی آرتھر کے معاہدے میں توسیع نہ کرنے کے اعلان کے بعد اب انہیں ایک اور دھچکا پہنچ گیا ہے۔

غیرملکی میڈیا رپورٹس کے مطابق اب مکی آرتھر کو انگلش ٹیم کی کوچنگ ملنے کے امکانات بھی بہت کم ہوگئے ہیں، وہ انگلش کوچ ٹریور بیلس کے متبادل کی دوڑ میں بھی شامل تھے۔

رپورٹ کے مطابق انگلینڈ اینڈ ویلز کرکٹ بورڈ ٹریور بیلس کی جگہ کسی ٹھنڈے دل و دماغ کے مالک کوچ کی خدمات حاصل کرنے کا خواہاں ہے۔

واضح رہے کہ انگلش ٹیم نے بیلس کی کوچنگ میں ورلڈکپ 2019 کا ٹائٹل اپنے نام کیا تاہم وہ حالیہ ایشز سیریز کے بعد عہدے سے دستبردار ہوجائیں گے کیونکہ انہیں آئی پی ایل فرنچائز سن رائزرز حیدرآباد کو جوائن کرنا ہے۔

ذرائع کا کہنا ہے کہ جذباتی پن کی وجہ سے مکی آرتھر کو انگلش ٹیم سے وابستہ کرنے کے امکانات نہ کے برابر ہیں جبکہ وہ سری لنکا کی کوچنگ ریس سے بھی باہر ہوگئے ہیں۔