عالمی کرکٹ کپ 2019 کے پہلے سیمی فائنل میں کیویز نے بھارت کو شکست دے کر ٹورنامنٹ سے باہر کیا تو یہ ہار بھارتیوں سے اب تک ہضم نہیں ہوسکی ہے تاہم اب کیوی آل راؤنڈر جمی نیشم نے بھارتی شائقین کرکٹ کو انتہائی اہم مشورہ دے ڈالا ہے۔ تفصیلات کے مطابق کیوی آل راؤنڈر جمی نیشم نے مائیکرو بلاگنگ ویب سائٹ ٹویٹر پر پیغام شیئر کرتے ہوئے لکھا ہے کہ ' اگر آپ ورلڈکپ فائنل میں نہیں آنا چاہتے تو براہِ مہربانی آفیشل پلیٹ فارم کے ذریعے اپنے ٹکٹ کو بیچ دیں، میں جانتا ہوں ایسے بڑا منافع حاصل کیا جاسکتا ہے لیکن براہِ کرم کرکٹ کے تمام مخلص مداحوں کو دیکھنےکا موقع دیں، صرف امیروں کو ہی یہ موقع نہیں ملنا چاہیئے'۔ Dear Indian cricket fans. If you don’t want to come to the final anymore then please be kind and resell your tickets via the official platform. I know it’s tempting to try to make a large profit but please give all genuine cricket fans a chance to go, not just the wealthy ❤️ 🏏 — Jimmy Neesham (@JimmyNeesh) July 12, 2019 آپ کو بتاتے چلیں کہ بھارتی شائقین کرکٹ اپنی ٹیم کی کامیابی کیلئے اس قدر پر اعتماد تھے کہ فائنل میچ کی فروخت ہونے والی 41 فیصد ٹکٹیں بھی انہوں نے ہی خرید رکھی تھیں۔ اس اثناء میں جب بھارتی ٹیم ٹورنامنٹ سے باہر ہوئی تو مداحوں کی جانب سے شدید غم و غصے کا اظہار کیا گیا اور متعدد کھلاڑیوں کو سخت تنقید کا نشانہ بنانے کا سلسلہ جاری ہے۔ بھارتی ٹیم کے ٹورنامنٹ سے باہر ہونے کے بعد یہ امکان ظاہر کیا جارہا ہے کہ فائنل میچ کی ٹکٹیں خریدنے والے بھارتیوں کی اکثریت میچ دیکھنے نہیں جائے گی، ایسے میں کیوی آل راؤنڈر جمی نیشم نے بھارتی مداحوں کیلئے ایسا پیغام جاری کردیا جو ان کے زخموں پر نمک چھڑکنے کے مترادف ہی ہے۔ واضح رہے عالمی کپ 2019 کا فائنل معرکہ کل بروز اتوار 14 جولائی کو میزبان انگلینڈ اور نیوزی لینڈ کے درمیان لارڈز کرکٹ اسٹیڈیم پر کھیلا جائے گا، میچ پاکستانی وقت کے مطابق دوپہر ڈھائی بجے شروع ہوگا۔
