مسلم لیگ نون کے رہنما شاہد خاقان عباسی کا کہنا ہے کہ آج پاکستان کی جوڈیشری کا امتحان ہے،جج خود کہہ رہے ہیں کہ انہوں نے فیصلے دباو میں دئیے۔مریم اورنگزیب کہتی ہیں کہ جس جج نے غلط فیصلہ کیا اسکے فیصلے کو بھی کالعدم قرار دیا جائے۔ایاز صادق نے کہا کہ عمران خان نے پاکستان کا آئی ایم ایف سے سودا کیا ہے۔
شیخوپورہ میں مسلم لیگ نون کے ورکرز کنوینشن سے خطاب کرتے ہوئے سابق وزیراعظم شاہد خاقان عباسی کا کہنا تھا کہ دس ماہ میں ملک کا جو حال کردیا گیا وہ سب کے سامنے ہے۔آج جو ہو رہا ہے وہ ملک کے حق میں ہے نہ ہی جمہوریت کے۔
ترجمان مسلم لیگ نون مریم اورنگزیب نے خطاب میں کہا کہ ملک میں بسیں ،سڑکیں اور کاروبار بند ہونے سے وزیراعظم کو کوئی سروکار نہیں۔کیونکہ وہ خود یہ سب کچھ کرتے آئے ہیں۔پانچ روز کے دوران کیے جانیوالے ورکرز کنوینشن میں اندازہ ہوا کہ الیکشن میں کتنابڑا ڈاکا مارا گیا ہے۔
سابق اسپیکر قومی سردار ایاز صادق کا کہنا تھا کہ عمران خان کہتے تھے کہ وہ کشکول نہیں اٹھائیں گے اور آج ملک کو آئی ایف کے ہاتھوں بیچ دیا۔
ورکرز کنوینشن میں لیگی کارکنان بھی خاصے پرجوش رہے اور پارٹی کے حق میں نعرے بازی کرتے رہے۔
