آسٹریلیا کے عثمان خواجہ کے ورلڈکپ سے باہر ہونے کے بعد اب ایک اور کھلاڑی کی فٹنس سیمی فائنل سے قبل کینگروز کیلئے درد سر بن گئی۔
تفصیلات کے مطابق آل راؤنڈر مارکس اسٹوئنس کی شرکت فٹنس مسائل کے باعث انگلینڈ کے خلاف شیڈول ورلڈکپ سیمی فائنل میں مشکوک ہوگئی ہے جس کی وجہ سے آسٹریلیا کی مشکلات میں اضافہ ہوگیا ہے۔
عثمان خواجہ اور مارکس اسٹوئنس کے کور اپ کے طور پر آل راؤنڈر مچل مارش اور میتھیو ویڈ کو ٹیم میں طلب کرلیا گیا ہے، دونوں کھلاڑی جنوبی افریقہ کے خلاف کھیلے گئے آخری لیگ میچ میں انجریز کا شکار ہوئے تھے۔
آسٹریلوی ٹیم مینجمنٹ کی طرف سے جاری کردہ بیان کے مطابق عثمان خواجہ ہیمسٹرنگ جبکہ اسٹوئنس نے فیلڈنگ کے دوران دائیں جانب درد کی شکایت کی تھی۔
واضح رہے میزبان انگلینڈ اور کینگروز کے درمیان ورلڈکپ کا دوسرا سیمی فائنل 11 جولائی کو کھیلا جائے گا۔
