معروف بولی وڈ اداکار انیل کپور کی اداکاری ہمیشہ سے مداحوں کیلئے متاثر کن رہی ہے۔ تین دہائیوں تک بولی وڈ میں کام کرنے والے انیل کے بارے میں عام ہے کہ انہوں نے پہلےبار1983 کی فلم 'وہ سات دن' میں مرکزی کردار نبھایا تھا۔ لیکن ہم یہاں آپ کو بتاتے چلیں 1983 سے کہیں پہلے انیل کپور نے 1979 کی انڈین فلم 'ہمارا تمہارا' میں ایک چھوٹا سا کردار نبھایا تھا اور اس سے بھی قبل وہ فلم 'تو پائل میں گیت 'میں ششی کپور کے بچپن کا کردار ادا کر چکے تھے۔ حال ہی میں ایک انٹرویو کے دوران انیل کپور نے اپنا بچپن یاد کرتے ہوئے بتایا کہ انہوں نے پہلی بار اداکاری ساتویں جماعت میں کی تھی اور اس بات کا علم ان کےوالدین کو نہ تھا، البتہ شوٹنگ شروع ہونے کے بعد انہوں نے والدین کو بتا دیا تھا۔ کرن تھاپر کے شو 'فیس ٹو فیس' میں انیل کپور کا کہنا تھا کہ ساتویں جماعت میں جب انہیں پہلی دفعہ اپنے دوست کے ذریعے اداکاری کا موقع ملا تو انہوں نے فوراً ہاں کردی۔ انہوں نے مزید کہا' میں آڈیشن میں باآسانی کامیاب ہو گیا تھا ۔ اگر فلم کی شوٹنگ سے پہلے میں نے والدین کو بتادیا ہوتا تو وہ مجھے کبھی اجازت نہ دیتے،تاہم میں نے انہیں شوٹنگ شروع ہونے کے بعد حقیقت بتانے کا فیصلہ کیا تھا'۔ اس کے علاوہ انہوں نے بتایا کہ کیسے انہوں نے اس فلم کیلئے اپنے چہرے پر دو دن تک میک اپ رہنے دیا تھا۔ بشکریہ: بولی وڈ ببل
