عام طور گھروں میں موجود کئی ایسی چیزیں ہوتی ہیں جنہیں ہم برسوں استعمال کرتے رہتے ہیں یہ سوچے بغیر کہ ان کے استعمال کی مقررہ مدت باقی ہے یا ختم ہوگئی،ان میں چند گھریلو چیزیں جیسے تولیہ،ٹوتھ برش کنگھی وغیرہ شامل ہیں،ان اشیاء کا طویل مدت تک استعمال  انسانی صحت پر مضر اثرات مرتب کرسکتا ہے۔

تولیہ

فائل فوٹو

تولیہ کا شمار گھر میں استعمال ہونے والی عام اشیاء میں ہوتا ہے،تولیہ جسم کی صفائی کیلئے استعمال کیا جاتا ہے،لہٰذا اس میں جرا ثیم بھی بے شمار ہوتے ہیں،اس بات کا لازمی خیال رکھیں کہ گھر میں موجود تمام افراد کا تولیہ الگ ہو ،تولیے کی صفائی کا بھرپور خیال رکھیں اسے باقاعدگی کے ساتھ دھونا چاہئے اس کے علاوہ  ہر سال اپنا تولیہ نئے تولیے سے بدل دیں۔

کنگھی

فائل فوٹو

عموماً گھر میں استعمال ہونے والی کنگھی کے بارے میں شاید ہی کوئی بتا سکے کہ یہ کب گھر میں لائی گئی تھی،کنگھی کو بھی باقاعدگی کے ساتھ دھو کر صاف کرنا چاہئے اس طرح یہ جراثیم سے پاک ہوجاتی ہے،اس کے علاوہ ایک مقررہ مدت کے بعد اسے بھی نئی کنگھی سے تبدیل کردینا چاہئے۔

برتن دھونے کا اسپنج

فائل فوٹو

لوگ برتن دھونے پر بہت توجہ دیتے ہیں،کیونکہ انسانی صحت برتنوں کی صفائی  سے ہی ممکن ہے ،لیکن برتن صاف کرنے کے اسپنج کو تبدیل کرنے کا خیال شاید ہی کسی کو آتا ہو،زیادہ مدت تک استعمال کیے جانے والے اسپنج جراثیم سے بھرپور ہوتے ہیں لہٰذا انہیں ہر ماہ تبدیل کرنا چاہئے۔

ٹوتھ برش

فائل فوٹو

ٹوتھ برش گھر میں استعمال ہونے والی  اشیاء میں سب سے حساس ہے کیونکہ  یہ آپ کے منہ کے اندر کی صفائی میں استعمال ہوتا ہے،لیکن لوگ اس کی طرف زیادہ توجہ نہیں دیتے جو ان کی صحت کیلئے نہایت خطرناک ثابت ہو سکتا ہے،کوشش کرنی چاہئے کہ ہر 3 ماہ میں ٹوتھ برش تبدیل کرلیا جائے۔

تکیے کے غلاف

فائل فوٹو

تکیے کے غلاف میں بھی جراثیم موجود ہوتے ہیں جو انسان کو بیمار کردیتے ہیں ،اول تکیے کے غلاف ہفتے میں ایک بار لازمی دھوئیں اور ہر سال انہیں  نئے غلافوں کےساتھ تبدیل کردیں ،اس طرح آپ مختلف انفیکشن اور جراثیم سے محفوظ رہیں گے۔

نوٹ:یہ  تحریر محض عام معلومات عامہ کیلئے ہے