جناح اسپتال میں ینگ ڈاکٹرز کے دو گروپوں کے درمیان جھگڑے کے نتیجے میں اسپتال کی او پی ڈیز مسلسل 4 روز سے بند ہیں، جس کے باعث مریض اور تیماردار سخت پریشانی کا شکار ہیں۔ پولیس کی بھاری نفری نے موقع پر پہنچ کر صورتحال پر قابو پانے کی کوشش کی اور کچھ ڈاکٹرز کو اپنے ہمراہ لے گئی۔ تاہم اسپتال میں او پی ڈیز کھولنے کے باوجود ڈاکٹرز وہاں نہیں پہنچے، جس کے سبب مریضوں کا انتظار بڑھ گیا۔

ڈپٹی ڈائریکٹر سیکیورٹی جناح اسپتال کے مطابق ڈاکٹرز کا براہ راست مسئلہ سیکریٹری صحت کے ساتھ ہے اور ان کے مطالبات سیکریٹری صحت کے ذریعے پورے کیے جائیں گے۔ انہوں نے کہا کہ اسپتال میں جاری او پی ڈی کے بائیکاٹ سے حکومتی رٹ کو چیلنج کرنے کی اجازت نہیں دی جائے گی۔

ڈپٹی ڈائریکٹر نے مزید بتایا کہ اسپتال میں نظم و ضبط برقرار رکھنے کے لیے پولیس کی مدد طلب کی گئی ہے تاکہ اسپتال میں حالات کو بہتر بنایا جا سکے اور مریضوں کو فوری علاج فراہم کیا جا سکے۔