وزیراعظم شہباز شریف نے حکومتی کارکردگی کے نظام کی بہتری کے لیے کمیٹی تشکیل دے دی، وزیر خزانہ کو کنوینر مقرر کیا گیا ہے۔

تفصیلات کے مطابق وزیراعظم شہباز شریف نے حکومتی کارکردگی میں بہتری کے لیے وفاقی وزرا اور دیگر حکام پر مشتمل کمیٹی تشکیل دی ہے، جس کا باقاعدہ نوٹیفکیشن بھی جاری کر دیا گیا۔

نوٹیفیکیشن کے مطابق کارکردگی کے نظام کی اصلاح کے لیے وزیر خزانہ کو کنوینر مقرر کیا گیا جبکہ کمیٹی میں وزیر توانائی، وزیر موسمیاتی تبدیلی، چیئرمین ایف بی آر سمیت دیگر شامل ہیں۔

کمیٹی وفاقی حکومت کے تمام اداروں میں 360 ڈگری جائزہ نظام کے نفاذ کا جائزہ لے گی، کمیٹی ایف بی آر کے موجودہ 360 ڈگری ماڈل کا فریم ورک اور نتائج کا تجزیہ کرے گی جبکہ تمام وزارتوں و سروس گروپس میں 360 ڈگری ماڈل کے اطلاق اور توسیع کی جانچ ہوگی، قانونی و انتظامی تبدیلیوں کی ضرورت کا تعین بھی کمیٹی کے دائرہ کار میں شامل ہے۔

وفاقی اداروں کے لیے معیاری جانچ ٹیمپلیٹس اور فیڈبیک نظام تیار کیا جائے گا، شفاف، غیر جانبدار اور مؤثر جائزہ نظام کے لیے ڈیجیٹل پلیٹ فارمز کی تجاویز دی جائیں گی، پائلٹ مرحلے اور مکمل نفاذ کے لیے مرحلہ وار منصوبہ کمیٹی تیار کرے گی جبکہ کمیٹی تیس دن میں اپنی رپورٹ وزیراعظم کو پیش کرے گی۔