قومی وطن پارٹی کے چیئرمین آفتاب احمد خان شیرپائو نے آج نیوز سے خصوصی گفتگو میں کہا ہے کہ مائنز اینڈ منرلز ایکٹ چاہے پاس ہو بھی جائے، اس سے بانی چیئرمین کی رہائی ممکن نہیں، یہ صرف خام خیالی ہے۔

آفتاب شیرپائو نے مرکز اور خیبر پختونخوا حکومت کے کردار پر سوال اٹھاتے ہوئے کہا کہ ”مرکز میں تو بڑی اپوزیشن کی جا رہی ہے، لیکن صوبے میں مرکز کی من مانی کیوں چلنے دی جا رہی ہے؟“

انہوں نے خیبر پختونخوا کے وزیر اعلیٰ علی امین گنڈاپور کو بھی تنقید کا نشانہ بنایا اور کہا کہ ”علی امین گنڈاپور نے مائنز اینڈ منرلز ایکٹ پر جس قدر جلد بازی دکھائی، اس سے ضرور دال میں کچھ کالا محسوس ہوتا ہے۔“

چیئرمین قومی وطن پارٹی کا کہنا تھا کہ جب تک بانی چیئرمین جیل میں ہیں، پارٹی کے اندرونی معاملات میں کشیدگی برقرار رہے گی، اور پارٹی آگے نہیں بڑھ سکے گی۔

آفتاب شیرپائو کی یہ گفتگو پارٹی کے اندرونی حالات اور موجودہ سیاسی ماحول پر گہری نظر ڈالنے کا مظہر ہے، جس سے ظاہر ہوتا ہے کہ پارٹی کے مستقبل کے حوالے سے کئی سوالات جنم لے رہے ہیں۔