آرمی چیف جنرل سید عاصم منیر کی والدہ کی نماز جنازہ راولپنڈی میں ادا کر دی گئی۔

آرمی چیف جنرل عاصم منیر نے اپنی والدہ کی نماز جنازہ خود پڑھائی، نماز جنازہ میں صدر مملکت آصف علی زرداری، وزیراعظم شہباز شریف سمیت اعلیٰ عسکری و سول حکام نے شرکت کی۔

اس موقع پر سابق وزیراعظم نواز شریف، چیئرمین سینیٹ یوسف رضا گیلانی، اسپیکر قومی اسمبلی ایاز صادق،وزیر دفاع خواجہ آصف، وزیر داخلہ محسن نقوی، رانا ثنا اللہ، طارق فضل چوہدری، حنیف عباسی، امیر مقام اور دیگر اہم شخصیات نے نماز جنازہ میں شرکت کی۔

اس کے علاوہ سابق آرمی چیف قمر باجوہ، اشفاق پرویزکیانی، وزیراعلیٰ سندھ مراد علی شاہ اور وزیراعلیٰ بلوچستان سرفرازبگٹی وزیراعظم آزاد کشمیر چوہدری انوارالحق، گورنر سندھ کامران ٹیسوری بھی شریک ہوئے۔

نماز جنازہ کے موقع پر ملکی قیادت نے جنرل سید عاصم منیر سے دلی تعزیت کا اظہار کیا اور ان کی والدہ کے درجات کی بلندی کے لیے دعا کی، جنازے میں سینئر سیاسی و عسکری شخصیات کے علاوہ عوام کی بڑی تعداد نے بھی شرکت کی۔

آرمی چیف جنرل سید عاصم منیر کی والدہ کی وفات خبر سن کر سینئر سیاسی و عسکری شخصیات نے اپنے گہرے رنج و غم کا اظہار کرتے ہوئے مرحومہ کے درجات کی بلندی کے لیے دعا کی۔ وزیراعظم نے کہا کہ سوگوار خاندان کے دکھ میں برابر کے شریک ہیں۔

آرمی چیف کی والدہ انتقال کرگئیں

یاد رہے کہ آج آرمی چیف جنرل سید عاصم منیر کی والدہ ماجدہ رضائے الٰہی سے وفت پا گئیں، اللّٰہ باری تعالیٰ مرحومہ کے درجات بلند فرمائے اور انہیں جنت میں اعلیٰ مقام عطا فرمائے، آمین۔

صدرمملکت اور وزیراعظم کا اظہارِ افسوس

صدرآصف زرداری نے آرمی چیف جنرل عاصم منیر کی والدہ کی وفات پراظہارتعزیت کرتے ہوئے کہا کہ دکھ کی اس گھڑی میں میری ہمدردیاں لواحقین کے ساتھ ہیں۔

وزیراعظم شہباز شریف نے چیف آف آرمی سٹاف جنرل سید عاصم منیر کی والِدہ کے انتقال پر اظہار افسوس کیا ہے۔ وزیراعظم آفس سے جاری بیان میں انہوں نے کہا کہ سوگوار خاندان کے دکھ میں برابر کے شریک ہیں۔ وزیراعظم نے مرحومہ کے لیے بلندی درجات کی دعا کی۔

اسپیکر قومی اسمبلی کا اظہارِ افسوس

اسپیکرقومی اسمبلی سردار ایاز صادق نے آرمی چیف کی والدہ کے انتقال پراظہارافسوس کرتے ہوئے ان کےاہلخانہ سے دلی تعزیت اورہمدردی کا اظہار کیا۔

اسپیکر قومی اسمبلی نے کہا کہ انتقال کی خبر سن کر دلی دکھ اور افسوس ہوا، اہلخانہ کے غم اور صدمے میں برابر کا شریک ہوں۔ انھوں نے مرحومہ کے درجات کی بلندی اور اہلخانہ کیلئے صبر جمیل کی دعا کی۔

وفاقی وزیرداخلہ اور دیگر رہنماؤں کا اظہارِ افسوس

وفاقی وزیرداخلہ محسن نقوی نے آرمی چیف کی والدہ کے انتقال پرسوگوارخاندان سے دلی ہمدردی و اظہار تعزیت کیا۔ محسن نقوی نے مرحومہ کی بلندی درجات اور سوگوارخاندان کے لئے صبرجمیل کی دعا کی۔

سینیٹر شیری رحمان، خورشید شاہ، گورنر پنجاب، وزیراعلیٰ پنجاب مریم نواز، وزیر ریلوے حنیف عباسی اور دیگر رہنماؤں نے بھی تعزیتی پیغام میں آرمی چیف کی والدہ کے انتقال پر اظہارِ افسوس کیا۔