محکمہ داخلہ پنجاب نے یوم شہادت حضرت علی کرم اللہ وجہہ کے موقع پر سیکیورٹی کے حوالے سے احکامات جاری کردیے۔ جلوس، مجالس، مساجد اور امام بارگاہوں کی حفاظت کیلئے فول پروف انتظامات یقینی بنانے کی ہدایت کر دی۔

محمکہ داخلہ پنجاب نے ہدایات جاری کیں کہ یوم شہادت حضرت علیؓ کے موقع پر فول پروف حفاظتی انتظامات کیے جائیں، مساجد، مدارس اور امام بارگاہوں کی حفاظت کیلئے فول پروف انتظامات یقینی بنائے جائیں، تمام مساجد، امام بارگاہوں، عبادت گاہوں اور مزارات پر اضافی نفری تعینات کی جائے۔

محکمہ داخلہ کے مطابق ماتمی جلوس، محافل عزا اور مساجد میں عوامی اجتماعات کی سکیورٹی یقینی بنائی جائے، مقررین کسی بھی فرقے کے خلاف قابل اعتراض اور اشتعال انگیز تقریریں نہ کریں، پنجاب بھر میں اسلحہ رکھنے اور اس کی نمائش پر پابندی کا نفاذ کیا جائے۔

محکمہ داخلہ کی جانب سے ہدایات میں کہا گیا کہ پنجاب ساؤنڈ سسٹم (ریگولیشن) ایکٹ، 2015 کی خلاف ورزی پر سخت کارروائی کی جائے، مذہبی ہم آہنگی کو برقرار رکھنے کیلئے شرپسند عناصر پر کڑی نظر رکھی جائے، مرکزی جلوسوں کی کواڈ کاپٹرز کے ذریعے فضائی نگرانی یقینی بنائی جائے، جلوسوں کے روٹس پر واپڈا کی اہم ٹرانسمیشن لائنوں اور گیس پائپ لائنوں کو محفوظ کیا جائے۔

محکمہ داخلہ پنجاب کے مطابق صوبہ بھر کے تمام شہروں کے داخلی خارجی راستوں پر حفاظتی اقدامات یقینی بنائے جائیں، ممتاز مذہبی و سیاسی رہنماؤں کے تحفظ کیلئے خصوصی اقدامات کیے جائیں، ریسکیو 1122، سول ڈیفنس اور محکمہ صحت کو ہائی الرٹ پر رکھا جائے، تمام قانون نافذ کرنے والے اور انٹیلی جنس ادارے قریبی رابطہ برقرار رکھیں۔

محکمہ داخلہ کا کہنا ہے کہ تمام ڈپٹی کمشنرز، سی سی پی او لاہور، سی پی اوز، ڈی پی اوز سیکیورٹی پلان پر عملدرآمد یقینی بنائیں، تمام سیکیورٹی اہلکار جلوس مجالس کے مکمل منتشر ہونے تک ڈیوٹی پر موجود رہیں۔ امن و امان کی صورتحال برقرار رکھنے کیلئے تمام ضروری حفاظتی اقدامات اٹھائے جائیں۔