میئرکراچی مرتضیٰ وہاب نے شہر قائد کی ترقی کے لیے 100 ارب روپے کے پیکج اور وفاق سے مالی مدد مانگ لی۔ مرتضی وہاب نے گورنر سندھ کو خط لکھ دیا، جس میں کہا گیا کہ کراچی پورٹ تک سڑکوں کی مرمت کے لیے 35 ارب روپے درکار ہیں۔

میئر کراچی مرتضیٰ وہاب نے گورنر سندھ کامران ٹیسوری کو کراچی ترقیاتی پیکج کے لیے خط لکھ دیا، گورنر سندھ کی ہدایت پر میئر کراچی نے منصوبوں کی تفصیلات بھی جاری کرتے ہوئے مالی مدد طلب کرلی۔

میئر کراچی کی جانب سے لکھے گئے خط میں کراچی کی ترقی کے لیے 100 ارب روپے کا پیکیج اور وفاقی حکومت سے مالی مدد طلب کی گئی ہے۔

خط میں شاہراہ بھٹو سے نیشنل ہائی وے اور پورٹ قاسم تک ایکسپریس وے بنانے کی تجویز کی گئی جبکہ شمالی بائی پاس کی توسیع اور کراچی پورٹ تک سڑکوں کی مرمت کے لیے 35 ارب روپے کا تخمینہ بھی بتایا گیا۔

خط میں کہا گیا کہ گٹر باغیچہ میں منشیات کے عادی افراد کے لیے بحالی مرکز کی تعمیر کا منصوبہ ہے، کراچی میٹروپولیٹن یونیورسٹی میں نیا ایڈمنسٹریشن اور اکیڈمک بلاک بنانے کی تجویز ہے۔

مرتضیٰ وہاب کی جانب سے خط میں کراچی میں سفاری پارک کی توسیع کے لیے 5 ارب روپے مختص کرنے کی درخواست کی گئی۔

میئر کراچی کے خط میں کہا گیا ہے کہ گٹر باغیچہ میں 200 ایکڑ پر گرین زون بنانے کے منصوبے کے لیے 2 ارب روپے درکار ہیں، کراچی کے ساحلی علاقوں کی بحالی کے منصوبے کے لیے 5 ارب روپے درکار ہیں۔

خط میں کہا گیا ہے کہ کراچی ہاربر کی صفائی اور بحالی کے منصوبے کے لیے 5 ارب روپے درکار ہیں، ناردرن بائی پاس پر جدید مذبحہ خانہ اور گوشت پروسیسنگ زون بنانے کا منصوبہ ہے جبکہ کورنگی کریک پر پانی ری سائیکلنگ پلانٹ کے قیام کے لیے 5 ارب روپے درکار ہیں۔

میئر کراچی نے وفاقی حکومت سے شہری ترقیاتی منصوبوں میں تعاون کی اپیل کی ہے اور خط میں کہا گیا ہے کہ اولڈ سٹی ایریا میں تنگ جگہ اور کاروباری سرگرمیوں کے لیے وفاق کی زمین موجود ہے۔

خط کے مطابق کراچی میں آئی آئی چندریگر روڈ اور ایم اے جناح روڈ پر وفاق کی زمین پر پارکنگ پلازا بننے چاہیئے، پاکستان کوارٹرز، مارٹن کوارٹرز اور جمشید کوارٹرز وفاقی ملیر ہے اسے بہتری کی شدید ضرورت ہے، گورنر ہاؤس اس تمام صورتِ حال اور منصوبوں پر شہر کے لیے اپنا کردار ادا کرے۔