محکمہ موسمیات کا کہنا ہے کہ کراچی میں میں سرمئی بادلوں کا بسیرا اور موسم خوشگوار ہے، شہر قائد میں آج مطلع ابرآلود رہنے کا امکان ہے۔

محکمہ موسمیات کے مطابق کراچی میں آج زیادہ سے زیادہ درجہ حرارت 31 ڈگری سینٹی گریڈ تک جانے کا امکان ہے، شہر کا موجودہ درجہ حرارت 22 ڈگری سینٹی گریڈ ہے جبکہ کم سے کم درجہ حرارت 19 سے 21 ڈگری سینٹی گریڈ رہنے کا امکان ہے اور ہوا میں نمی کا تناسب 82 فیصد ہے۔

اے کیو آئی کے مطابق کراچی شہر کا فضائی معیار بدستور خراب ہے، دنیا کے آلودہ ترین شہروں میں کراچی 25 نمبر پر ہے، ہوا میں آلودہ ذرات کی مقدار 123 پرٹیکیولیٹ میٹرز ہے۔

ملک کے بیشتر اضلاع میں بارش اور پہاڑوں پر برفباری کا امکان

دوسری جانب محکمہ موسمیات کا کہنا ہے کہ ملک کے بیشتر اضلاع میں بارش اور پہاڑوں پر برفباری کا امکان ہے جبکہ اسلام آباد اور پنجاب میں بارش اور ژالہ باری کا امکان ہے۔

عوام تیاری پکڑ لیں، ملک میں بارشوں اور برف باری کا نیا سلسلہ آج سے شروع ہونے کا امکان

خیبرپختونخوا اور بلوچستان میں گرج چمک کے ساتھ بارش ہوگی، راولپنڈی، اٹک، جہلم، گجرات اور چکوال میں بارش کا امکان ہے، مری اور گلیات میں تیزہواؤں کے ساتھ بارش اور برفباری ہوگی۔

سندھ کے بیشتر اضلاع میں موسم خشک رہنے کا امکان ہے، کشمیر اور گلگت بلتستان میں بارش اور شدید برفباری ہوگی جبکہ سیاحوں کو محتاط رہنے اور غیرضروری سفر سے اجتناب کی ہدایت کی گئی ہے۔

خیبر پختونخوا میں مزید بارش اور پہاڑوں پر برفباری کا امکان

خیبرپختونخوا میں بارشون کا سلسلہ جاری ہے، صوبے میں آئندہ 24 گھنٹون کے دوران مزید بارش اور پہاڑوں پر برفباری کا امکان ہے۔

محکمہ موسیات نے آئندہ 24 گھنٹوں میں پشاور، مردان، مہمند، چارسدہ، شمالی علاقہ جات، ملاکنڈ ڈویژن اور جنوبی اضلاع میں بارش کا امکان ظاہر کیا ہے جبکہ اسی طرح پہاری علاقوں کالام، چترال اور مالم جبہ میں برف باری کا بھی امکان ہے۔

محکمہ موسمیات کے مطابق گزشتہ روز کوہستان میں سب سے زیادہ 32 ملی میٹر اور پشاور میں سب سے کم ایک ملی میٹر بارش ریکارڈ کی گئی، گزشتہ روز چترال میں دو انچ اور کالام میں ایک انچ برف بھی پڑی۔