وزیراعظم شہباز شریف کی زیر صدارت وفاقی کابینہ کے اجلاس میں اہم فیصلے کیے گئے جبکہ اجلاس کا اعلامیہ جاری کر دیا گیا، اعلامیے کے مطابق وفاقی کابینہ کے اجلاس میں توشہ خانہ کے نظام میں مزید شفافیت لانے کے لیے توشہ خانہ ایکٹ 2024 پر نظر ثانی کا فیصلہ کرلیا گیا، وزیراعظم نے اس حوالے سے وزیر دفاع خواجہ آصف کی سربراہی میں کمیٹی تشکیل دے دی۔

تفصیلات کے مطابق وزیراعظم شہباز شریف کی زیر صدارت وفاقی کابینہ کا اجلاس آج وزیراعظم ہاؤس اسلام آباد میں منعقد ہوا، اجلاس کا اعلامیہ جاری کردیا گیا۔

وزیراعظم آفس سے جاری اعلامیے کے مطابق وفاقی کابینہ نے کابینہ ڈویژن کی سفارش پر پاکستان میں کام کرنے والے بیرون ملک کے موجودہ 86 پائلٹس کے لائسنز کی توثیق میں 2 سال اور 2025 میں نئے پائلٹس کی شمولیت کی فارن ویلیڈیشن میں 3 سال کی توسیع کی منظوری دے دی۔

اعلامیے کے مطابق کابینہ کو بریفنگ میں بتایا گیا کہ گزشتہ سالوں میں کورونا وبا اور پاکستانی پائلٹس پر پابندی کی وجہ سے پاکستانی ایئر لائنز کو بیرون ملک سے پائلٹس کی خدمات حاصل کرنی پڑیں۔

وزیراعظم کی قومی اسمبلی اجلاس میں شرکت، اپوزیشن اور حکومت کی شدید نعرے بازی، ایجنڈے کی کاپیاں پھاڑ دی گئیں

اعلامیے میں مزید کہا گیا کہ کابینہ ڈویژن کی مذکورہ بالا سفارش پر مکمل قانونی کارروائی کے بعد عمل درآمد کیا جائے گا۔

وزیراعظم نے توشہ خانہ کے نظام میں مزید شفافیت لانے کے لیے خصوصی اقدمات کا فیصلہ کیا ہے، توشہ خانہ ایکٹ 2024 پر نظر ثانی کے لیے وزیر دفاع خواجہ محمد آصف کی سربراہی میں کمیٹی تشکیل دے دی۔

وفاقی کابینہ نے کابینہ ڈویژن کی سفارش پر نیشنل سییڈ ڈویلپمنٹ اینڈ ریگولیٹری اتھارٹی کے چیئرمین اور ممبران کی تعیناتی کے حوالے سے قوائد وضوابط کی منظوری دے دی۔

اعلامیے کے مطابق وفاقی کابینہ نے کابینہ ڈویژن کی سفارش پر پریوینشن آف الیکٹرانک کرائمز ایکٹ 2016 کی ذمہ داری وزارت آئی ٹی سے وزارت داخلہ کو منتقل کیے جانے کے حوالے سے رولز آف بزنس 1973 میں ترمیم کی منظوری دے دی۔

وفاقی کابینہ نے وزارت قانون و انصاف کی سفارش پر نشینل الیکٹرک پاور ریگولیٹری اتھارٹی (نیپرا) اپیلیٹ ٹربیونل کے ممبر فنانس کے طور پر ڈاکٹر عمار حبیب خان کی تعیناتی کی منظوری دے دی-

وزیراعظم نے یوٹیلیٹی اسٹورز کارپوریشن کی تعمیر نو کے عمل کو تیز کرنے اور اس عمل کی مؤثر نگرانی کے لیے کمیٹی تشکیل دے دی۔

اس موقع پر خطاب کرتے ہوئے وزیراعظم شہباز شریف نے ہدایت کی کہ پرائم منسٹر ریلیف پیکج مستحقین تک پہنچانے کے لیے نئی مؤثر حکمت عملی بنائی جائے۔

وفاقی کابینہ نے اقتصادی رابطہ کمیٹی (ای سی سی) کے 6 جنوری 2025 اور 17 جنوری 2025 کے اجلاس میں کیے گئے فیصلوں کی توثیق کردی۔