وزیراعظم شہباز شریف نے حج 2025 کے لیے خصوصی تیاریوں کی ہدایت کرتے ہوئے کہا ہے کہ حجاج اللہ کے مہمان ہیں، ان کی معاونت میں کسی قسم کی لاپروائی قبول نہیں کروں گا۔

وزیراعظم شہباز شریف کی زیر صدارت حج 2025 کی تیاریوں کے حوالے سے جائزہ اجلاس ہوا، جس میں وفاقی وزرا احد خان چیمہ، چوہدری سالک حسین اور متعلقہ اعلیٰ حکام نے شرکت کی۔

اجلاس میں وزیرِ اعظم کو حج 2025 کی تیاریوں پر تفصیلی بریفنگ دی گئی، اجلاس کے شرکا کو حج فنڈ پر پیشرفت سے آگاہ کرتے ہوئے بتایا گیا کہ اس پر کام حتمی مراحل میں ہے۔

بریفنگ میں مزید بتایا گیا کہ گزشتہ برس کی طرح اس سال بھی حجاج کرام کو سمز کی فراہمی پاکستان سے کی جائے گی اور حجاج کی معاونت کے لیے حج موبائل ایپلی کیشن بھی فعال ہے۔

پاکستانی حجاج قربانی کی مد میں کتنی رقم خرچ کریں گے؟ اعداد و شمار جاری

وزیرِ اعظم شہباز شریف نے حج 2025 میں معاونینِ حج کے انتخاب کے طریقہ کار، ان کی ذمہ داریاں اور دیگر انتظامات پر تفصیلات طلب کرلیں اور حج ڈیوٹی پر اچھی شہرت کے قابل افسران تعینات کرنے کی ہدایت کی۔

پاکستان اور سعودی عرب کے درمیان حج 2025 کیلئے معاہدہ طے پاگیا

اجلاس کے دوران گفتگو کرتے ہوئے وزیراعظم نے کہا کہ حج 2025 کی تیاری میں کسی قسم کی لاپرواہی قبول نہیں، حجاج کرام کو ہر قسم کی معاونت و سہولت کی فراہمی یقینی بنائی جائے، حج کی تیاریوں کے حوالے سے ایک جامع بریفنگ تیار کرکے آئندہ چند روز میں پیش کی جائے۔

شہباز شریف نے کہا کہ حجاج کرام کو حج 2025 کے حوالے سے تربیت کی بہترین سہولیات فراہم کی جائیں، حجاج کرام اللہ کے مہمان ہیں، حکومت کی جانب سے ان کی خدمت و معاونت میں کسی قسم کی لاپروائی قبول نہیں کروں گا۔

انہوں نے مزید کہا کہ حجاج کرام کی رہائش اور سفری و دیگر سہولیات کا خاص خیال رکھا جائے، حجاج کرام کے لیے معاونین کے انتخاب کے طریقہ کار میں شفافیت اور میرٹ کو ملحوظِ خاطر رکھا جائے۔

وزیراعظم کی قومی شاہراہوں اور موٹر ویز پر پولیسنگ اور پیٹرولنگ بہتر بنانے کی ہدایت

دوسری جانب وزیراعظم شہباز شریف نے قومی شاہراہوں اور موٹر ویز پر پولیسنگ اور پیٹرولنگ بہتر بنانے کی ہدایت کردی۔

وزیراعظم محمد شہباز شریف کی زیر صدارت نیشنل ہائی وے اتھارٹی کے امور اور قومی شاہراہوں اور موٹرویز پر حفاظتی اقدامات کے حوالے الگ الگ جائزہ اجلاس ہوئے، جس میں وفاقی وزرااسحاق ڈار،احد خان چیمہ عبدالعلیم خان اور متعلقہ اعلیٰ سرکاری افسران نے شرکت کی۔

نیشنل ہائی وے اتھارٹی سے متعلق اجلاس کے شرکا سے گفتگو کرتے ہوئے وزیراعظم نے کہا کہ قومی شاہراہیں اور موٹر ویز قومی ترقی اور ملکی معیشت میں ریڑھ کی ہڈی کی حیثیت رکھتی ہیں، ملک بھر میں بہترین سفری سہولیات کی فراہمی حکومت کی اولین ترجیحات ہیں، اہم قومی منصوبوں کے حوالے سے تیز تر اور ترجیحی بنیادوں پر کام کیا جائے۔

شہباز شریف نے سکھر حیدرآباد موٹروے کی تعمیر، رتو ڈیرو گوادر موٹر وے کے بقیہ حصوں کی تعمیر اور حیدرآباد کراچی موٹر وے، کراچی کوئٹہ چمن قومی شاہراہ اور قراقرم ہائی وے کے کچھ حصوں کی تعمیر نو کے حوالے سے کام کا جائزہ لینے کے حوالے سے اسٹیئرنگ کمیٹی تشکیل دینے کی ہدایت کردی۔

اجلاس میں قومی شاہراہوں اور موٹر ویز پر جاری ترقیاتی کاموں کے حوالے سے بریفنگ دی گئی۔

اجلاس کو بتایا گیا کہ لاہور ساہیوال بہاولنگر موٹروے کے پہلے فیز لاہور ساہیوال پر کام کا آغاز کیا جا رہا ہے، پہلے مرحلے میں لاہور رنگ روڈ تا رائے ونڈ قصور روڈ زمین کی خریداری کی جا رہی ہے، اس موٹر وے سے جنوب مشرقی پنجاب کے کئی اضلاع مستفید ہو سکیں گے۔

قومی شاہراہوں اور موٹرویز پر حفاظتی انتظامات سے متعلق اجلاس میں وزیراعظم نے موٹر ویز پر تمام حفاظتی جنگلوں کی مرمت کا کام ایک ماہ کے اندر مکمل کرنے کی ہدایت کی۔

شہباز شریف نے مزید ہدایت کی کہ ایسے افراد جو ان حفاظتی جنگلوں کو چوری کرتے ہیں یا ان جنگلوں کو خریدتے ہیں ان سب کے خلاف سخت کارروائی عمل میں لائی جائے۔

اجلاس کو بتایا گیا کہ ملک بھر کی موٹرویز پر 4027 کلومیٹرز حفاظتی جنگلے نصب ہیں جن میں سے 859 کلومیٹرز حفاظتی جنگلے یا تو چوری ہوئے یا انہیں نقصان پہنچایا گیا، موٹر ویز حفاظتی جنگلوں کی عدم موجودگی کے باعث پچھلے چار سالوں میں 36 حادثات رپورٹ ہوئے، پچھلے 4 سالوں میں موٹرویز پر حفاظتی جنگلوں کی چوری اور انہیں نقصان پہنچانے کے حوالے سے 178 ایف آئی آرز درج کی گئیں۔

اجلاس کو مزید بتایا گیا کہ موٹرویز کو اسٹریٹیجک اسیٹ قرار دینے کے حوالے سے قانون سازی کی جارہی ہے۔